Жорий йилнинг 13 ноябрь куни Ўзбекистон Республикаси Миллий гвардияси қўмондонининг ёшлар масалалари бўйича ўринбосари ҳамда  Ўзбек жанг санъати федерацияси раиси бошчилигида учрашув бўлиб ўтди. Унда Ўзбек жанг санъати айнан этноспорт турларидан бири эканлигига алоҳида тўхталиб ўтишди ва келгусида ҳамкорликни ривожлантириш юзасидан бир қатор келишувларга эришилди.

Меморандумга мувофиқ томонлар қуйидаги йўналишларда ҳамкорлик қиладилар:

спортнинг Ўзбек жанг санъати турига оид масалалар юзасидан ўзаро фикр алмашиш, тушунтириш ва маслаҳатлар бериш, тизим спортчилари учун амалий ёрдам кўрсатиш, ўқув қўлланма китоблар чоп этиш ҳамда семинарлар ўтказиш;

нуфузли чемпионатлар ҳамда халқаро турнирлар ғолиблари иштирокида ёш спортчилар, ходимларга мастер-класслар ташкиллаштириш;

Миллий гвардия ҳарбий хизматчиларини (ходимларини) Ўзбек жанг санъати спорт турига аъзо қилиш;

ҳар иккала томондан ўтказилган халқаро  ва республика миқёсидаги мусобақаларда иштирок этиш;

байрам тадбирлари, мусобақаларда Томонларнинг турли кўргазмали чиқишларини ташкиллаштириш;

ҳудудлардаги иқтидорли ёшларни саралаб олиш мақсадида Томонларнинг ҳамкорликдаги спорт тадбирларини ўтказиш;

ўзаро тажриба алмашнувини ташкил этиш  мақсадида Ўзбек жанг санъати соҳасида турли конференция, семинар, учрашув, ўқув машғулотларини ташкиллаштириш;

мазкур спорт турининг чавандозлик, камондан ўқ отиш йўналишлари бўйича Миллий гвардия ҳарбий хизматчи ва ходимларига белгиланган тартибда машғулотларини ўтказилишини ташкиллаштириш;

спорт тури бўйича спорт устаси ҳамда Ўзбекистон миллий терма жамоаси аъзолиги таркибига бўлган спортчиларни тизимга белгиланган тартиб қоидалар бўйича хизматга қабул қилиш;

ҳарбий хизматчи ва ходимларга спорт турининг Ватан, Истиқлол, Қалқон, Амир Темур, Жалолиддин Мангуберди, Паҳлавон Маҳмуд, Алпомиш, Бобур Мирзо, Ал-Хоразмий, Ибн-Сино, Мирзо Улуғбек, Ал-Фарғоний, Широқ, Ат-Термизий, Абу Наср Фаробий, Темур Малик, Ўзбекистон каби комплекс машқларини малакали тренерлар томонидан ўргатиб бориш;

Вилоятлардаги олий маҳорат мактаблари, олимпия захиралари спорт коллежлари, болалар ва ўсмирлар спорт мактабларида спорт тури бўйича спорт бўлинмаларининг очилишини ҳамкорликда ташкиллаштириш.