Пойтахтимиздаги Aдиблар хиёбонида жамоат хавфсизлигини таъминлаётган Миллий гвардия ходимлари томонидан ўзаро жанжаллашаётган бир гуруҳ ёшлар аниқланиб, ҳолат ўз вақтида бартараф қилинди.
Аниқланишича, Aдиблар хиёбонида ўтирган йигит ва қиз фуқаро С.Ў. ҳамда Ҳ.Х. ларнинг яқин муносабатларини икки нафар бегона шахслар расмга олиб, ушбу расмларни ижтимоий тармоқларда тарқатмаслик эвазига улардан пул талаб қилишган.
Мазкур вазиятни узоқдан пайқаган Миллий гвардия ходимлари уларга яқинлашганда иккита йигит қочишга уринган, йигит ва қиз эса жойида қолган. Ходимлар томонидан қочишига йўл қўйилмасдан, қўлга олинган йигитлар билан олиб борилган суҳбат жараёнида қилган ножўя ишларини тан олиб, телефонидаги тасвирга олинган фотосуратларни ўчириб ташлаш эвазига йигит ва қиздан пул талаб қилишганини, рад қилишса ижтимоий тармоқларда тарқатишлари билан таҳдид қилишганлигини билдиришган.
Шунингдек, жанжал кўтарилишини хоҳламаган фуқаро У.С. тўлов тизими орқали йигитлардан бирининг телефонига 35 минг сўм ўтказиб берганлиги, аммо улар бунга қониқмасдан қиздан ҳам 50 минг сўм ўтказишни талаб қилишганидан сўнг, ўзаро жанжаллашиб кетганликларини таъкидлашган.
Шундан сўнг, Миллий гвардия ходимлари қочишга уринган йигитларни профилактика инспектори хонасига олиб боришган. Суриштирув ишлари давомида қўлга олинган фуқаролар 16 ёшли Р.И. ва С.С.лар эканлиги маълум бўлган ва уларнинг ота -оналарига хабар қилинган.
Мазкур ҳолат юзасидан ички ишлар ходимлари томонидан суриштирув ишлари давом этмоқда.
