Россия Федерацияси Москва шаҳрида  9-14 ноябрь кунлари бўлиб ўтган қўл жанги бўйича VIII Жаҳон кубоги мусобақасида, юқори натижага эришган Миллий терма жамоамиз спортчилари ва уларнинг мураббийлари  билан,  Ўзбекистон ҳуқуқни мухофаза қилиш органлари Қўл жанги федерацияси раиси, Миллий гвардия қўмондони  Р.Джураевнинг  учрашуви бўлиб ўтди.

Мазкур тантанали тадбирда, Ўзбекистон Республикаси Олий Мажлиси Сенати аъзоси, Ахборот сиёсати ва давлат органларида очиқликни таъминлаш масалалари қўмитаси раиси ўринбосари Ф.Боқиев, Ўзбекистон Республикаси Ёшлар ишлари агентлиги директори А.Саъдуллаев, шунингдек Ўзбекистон Джит-КунДо, Ўзбек жанг санъати федерациялари, Ўзбекистон Кикбоксинг ва Тэквандо ИТФ Ассоциациялари  раислари, Миллий гвардия  ва ҳамкор вазирликларлар мутасадди раҳбарлари ҳамда Қўл жанги федерецияси раиси ўринбосарлари, малакали мураббийлари ва спортчилари иштирок этишди.

Миллий гвардия қўмондони кириш сўзида Мазкур Жаҳон кубогида  Россия, АҚШ, Хитой, Туркия,  Германия, Италия каби 37 та давлатлар қаторида, Ўзбекистон миллий терма жамоаси муносиб иштирок этиб, 300 дан ортиқ спортчилар қаторида 30 нафар спортчиларимиз мамлакатимиз шарафини муносиб ҳимоя қилганликлари ва якуний натижаларга кўра  6 та олтин, 9 та кумуш, 8 та бронза медалларини қўлга киритиб, мамлакатимиз довруғини яна бир бор халқаро аренада намоён этганликларига алоҳида урғу берди.    

Сўз якунида Миллий гвардия қўмондони Ўзбекистон қўл жанги терма жамоасининг барча аъзоларига,  федерация раиси ўринбосарлари, спортчилар, мураббийлар, ҳакамлар ва шифокорларга, спортчиларнинг ота-оналарига ўз миннатдорчилигини билдириб, келгусида олдимизга қўйилган олий мақсадлар сари биргаликда ҳаракат қилиб, юқори натижаларга эришишга ва қўл жанги спортини яқин келажакда Олимпиада ўйинлари қаторидан жой олишига ишонч билдирди.

 Шундан сўнг Миллий гвардия қўмондонининг Халқаро мусобақа иштирокчилари ва уларнинг мураббийларини рағбатлантириш тўғрисидаги буйруқлари ўқиб эшиттирилди. Унга кўра барча иштирокчи спортчилар ва мураббийлар муносиб рағбатлантирилиб, Ўзбекистон Республикаси Миллий гвардиясининг “Намунали хизматлари учун” кўкрак нишонлари, Фахрий ёрлиғи ва қимматбахо совғалар топширилди.   

Тадбирда сўз олганлар томонидан ҳалқимиз учун юксак ғурур бахш этиб Янги Ўзбекистонимизга янги ғалабаларни туҳфа этаётган спортчиларимизга ва уларнинг мураббийларига самимий тилаклар  билдирилди.