ЙИЛ САРҲИСОБИ ҲАМДА УСТУВОР ВАЗИФАЛАРГА БАҒИШЛАНГАН ҲАЙЪАТ ЙИҒИЛИШИ БЎЛИБ ЎТДИ
Миллий гвардия қўмондони генерал-майор Р.Джураев раислигида 2021 йил давомида тизимда амалга оширилган ишлар ва 2022 йилда бажарилиши лозим бўлган устувор вазифаларга бағишланган видео-селектор тарзида Ҳайъат йиғилиши бўлиб ўтди.
Мазкур йиғилишда Ўзбекистон Республикаси Президенти ҳузуридаги Хавфсизлик кенгаши аппаратининг мутасадди раҳбарлари, Миллий гвардия таркибий ва ҳудудий бошқарма бошлиқлари, таълим муассаса ва ҳарбий қисм командирлари, шунингдек таклиф қилинган ҳарбий хизматчи ва ходимлар иштирок этишди.
Миллий гвардия қўмондони кириш сўзида, Муҳтарам Президентимиз раҳбарлигида Янги Ўзбекистонни шакллантиришнинг тарихий жараёнида турганимизни эслатиб, 2022 йил 29 январь куни "2022–2026 йилларга мўлжалланган Янги Ўзбекистоннинг тараққиёт стратегияси тўғрисида"ги Ўзбекистон Республикаси Президенти Фармони қабул қилинганлиги ва унда 7 та устувор йўналишлар бўйича вазифалар белгилаб олинганлиги ва Стратегиянинг еттинчи йўналиши – "Мамлакатимиз хавфсизлиги ва мудофаа салоҳиятини кучайтириш, очиқ, прагматик ва фаол ташқи сиёсат олиб бориш" деб номланиб, бунда 12 та йўналиш бўйича 2022 йилда 75 та мақсадни кўзлаган ишлар мазмун моҳияти тушунтириб ўтилди.
Шунингдек, жамоат хавфсизлигини таъминлаш соҳасидаги тарихий бўлган Ўзбекистон Республикаси Президенти Фармони – Миллий гвардиянинг вазифалари ва хизматини янги йўналишларини аниқ белгилаш билан бирга катта масъулият юклаганлиги алоҳида таъкидланди.
Шундан сўнг, Миллий гвардия тизимида 2021 йил мобайнида амалга оширилган кенг кўламдаги ишлар ва эришилган ютуқлар ёдга олиниб, шу қаторда йўл қўйилган камчиликларга ҳам алоҳида урғу берилди. Кун тартибида белгиланган масалалар юзасидан мутасадди раҳбарларнинг ахбороти тингланди. Хусусан, жавобгарлик ҳудудларда жамоат тартибини сақлаш, шахсий таркибнинг жанговар, жисмоний ва махсус тайёргарлиги, ҳарбий интизом ҳолати, ёшлар билан ишлаш, спортни оммалаштириш, малакали кадрлар танлаш ва тайёрлаш ҳамда жисмоний ва юридик шахсларнинг мулкларини ишончли қўриқлаш самарадорлигини ошириш масалалари, шунингдек Моддий-техник таъминот ва молиявий ишлар аҳволи ҳамда бўлинмаларнинг инфратузилмасини ривожлантириш борасида соҳавий хизматлар томонидан (вилоятлар кесимида) амалга оширилган ишлар кўриб чиқилди.
Таҳлилий ва танқидий руҳда ўтган йиғилишда кун тартибидаги барча масалалар атрофлича муҳокама қилиниб, Қўмондон ўринбосарлари, Қорақалпоғистон Республикаси, Сурхондарё, Фарғона ва Самарқанд вилоятлари бошқарма бошлиқлари томонидан билдирилган фикр ва мулоҳазалар тингланди ҳамда тизим олдида турган муҳим устувор вазифаларни амалга ошириш юзасидан комплекс чора-тадбирларни ишлаб чиқиш ва бажарилишини қатъий назоратга олиш бўйича тегишли топшириқлар берилди.
Йиғилиш сўнгида, Миллий гвардия қўмондони жорий йилнинг 13 январь куни бўлиб ўтган Хавфсизлик кенгаши йиғилишида Ўзбекистон Республикаси Қуролли Кучлари Олий Бош Қўмондони томонидан Миллий гвардияга бошқа куч тузилмалари билан ҳамкорликда бажарилиши юклатилган вазифаларни шахсий таркибга яна бир бор эслатиб, юклатилган вазифаларни юксак даражада бажаришда имкониятлардан тўлақонли фойдаланган ҳолда, барча куч ва воситаларни сафарбар этиш лозимлигини уқтириб ўтди.
Шунингдек, Миллий гвардия қўмондони тизимдаги барча ҳарбий хизматчи ва ходимлар ўз фаолиятларини "Бурч. Садоқат. Жасорат" жанговар шиори остида давом эттиришларига, яъни Ватан олдидаги бурчларини адо этишда, қасамёдига садоқатли бўлишлари, жанговар ва хизмат вазифаларини бажаришда жасорат кўрсата олишларига катта ишонч билдирди.
