Ўзбекистон Республикаси Жамоат хавфсизлиги университети 1-босқич курсантларини Ватанга қасамёд, “Темурбеклар мактаби” ва ҳарбий-мусиқа академик лицей ўқувчиларининг тантанали ваъдасига бағишланган маросим бўлиб ўтди
Тантанали тадбирда Ўзбекистон Республикаси Миллий гвардияси қўмондони генерал-майор Р.Джураев, Ўзбекистон Республикаси Олий Мажлис Қонунчилик палатаси Мудофаа ва хавфсизлик масалалари қўмитаси аъзоси Т.Чориев Ўзбекистон Республикаси ҳарбий прокурори адлия полковниги Б.Қудратхўжаев, Ўзбекистон Республикаси Хавфсизлик кенгаши котибияти ходими Д.Джалалов, фахрийлар, ота-оналар, оммавий ахборот воситалари ва бошқа мутасадди раҳбарлар иштирок этишди.
Мазкур тадбирни аҳамиятлиси шуки “Ватанга қасамёд”, тантанали ваъда бериш маросимида илк бор битта саф майдонида Миллий гвардия таълим тизимининг барча вакиллари иштирок этмоқда.
Тантанали маросим, Миллий гвардия қўмондони генерал-майор Р.Джураевга Жамоат хавфсизлиги университети бошлиғининг тадбирга тайёрлиги тўғрисидаги ахбороти билан бошланиб, шахсий таркиб қасамёд ва танатанали ваъда беришга келтирилди.
Ёшларимиз ўз ота-оналари ва яқинлари гувоҳлигида қилган Ватанга қасамёди ва тантанали ваъдалари юксак фахр ва ғурур рамзи эканлигини хис қилган ҳолда таълим муассасаларида ўқувчи, курсант ва магистрант сифатида давом эттириб етук кадр бўлиб шаклланишлари учун қадам қўйишди.
Миллий гвардия қўмондони ёшларни Ватанга қасамёд ва тантанали ваъда берганлиги билан табриклар экан, уларга “Ҳеч қачон унутманг, ғалаба ва бахт – астойдил интилганники! Янги Ўзбекистон, бутун халқимиз ва Президентимиз Сиздек мард, жасур ва билимли ёшларига ишонади! Сиз ёшлар ҳам, билдирилган юксак ишончни оқлаб, мамлакатимиз тинчлиги ва осойишталиги йўлида Ватанга қасамёдингиз ҳамда Миллий гвардиянинг “Бурч, Садоқат, Жасорат” шиорига содиқ қолган ҳолда Ўзбекистон Республикаси халқига ва Президентига садоқат билан хизмат қиласизлар!” дея ишонч билдирди.
Шунингдек, маросимда иштирок этаётган барча меҳмонларга, аввало фарзандини Ватан ҳимояси йўлида хизмат қилишга шай этиб тарбиялаган ота-оналарга, уларнинг мактабдаги устозларига миннатдорчилик билдирилди.
Ўз навбатида, сўзга чиққан Ўзбекистон Республикаси Олий Мажлис Қонунчилик палатаси Мудофаа ва хавфсизлик масалалари қўмитаси аъзоси ҳам кўзларида олов чақнаб турган ўғил-қизларни Ватанга қасамёди ҳамда тантанали ваъдаси билан қутлаб, Янги Ўзбекистоннинг эртанги истиқболи ёш авлод қўлида эканлигини ёдга олган ҳолда сафда турган ёшлар зиммаларидаги бурч ҳамда масъулиятни муносиб оқлашлари учун, Ватанимиз равнақи ва фаровонлиги учун сидқидилдан билим олишлари зарурлигини таъкидлашди.
Ота-оналар номидан сўз олганлар эса давлатимиз томонидан ёшлар таълим-тарбияси, уларнинг келажак мақсади ва истиқболи йўлида яратиб берилаётган улкан имкониятларни эътироф этишиб юртбошимизга ўз миннатдорчилигини билдиришди.
Маросимнинг бадиий қисмида Ўзбекистон Республикаси Миллий гвардияси ҳарбий мусиқа академик-лицейи ўқувчиларининг “Зарбли чолғулар ансамбли”, ҳарбий оркестр жамоаси, курсантлар томонидан Бобур образининг саҳналаштирилганлиги, шунингдек ҳарбий хизматчиларнинг кўргазмали чиқишлари намойиш этилди.