Бугунги кунда умумий ўрта таълим фанлари доирасида ҳарбий-ватанпарварлик йўналиши бўйича ўқувчиларнинг чуқур таълим олишини таъминлаш мақсадида 2020 йил 17 апрель куни “Умумий ўрта таълим мактабларида ҳарбий-ватанпарварлик синфлари фаолиятини ташкил этиш чора-тадбирлари тўғрисида” ги ҳукумат қарорига мувофиқ ҳарбий-ватанпарварлик йўналишига ихтисослаштирилган синфлар фаолияти йўлга қўйилган бўлиб, Республикамиз бўйлаб 56 та умумтаълим мактабларидаги ихтисослаштирилган синфлар Ўзбекистон Республикаси Миллий гвардиясига бириктирилган.

Пойтахтимизда жойлашган Ғалаба боғида Тошкент шаҳридаги 4 та умумтаълим мактабининг 6-синфини муваффақиятли якунлаб, чуқурлаштирилган фанлардан қобилиятини кўрсатиб танлов асосида ҳарбий-ватанпарварлик синфларига қабул қилинган ўғил ва қизларнинг тантанали ваъда бериш маросимига бағишланган тадбир бўлиб ўтди.

Маросимда, Ўзбекистон Республикаси Миллий гвардияси қўмондонлиги, Ўзбекистон Республикаси Олий таълим, фан ва инновациялар, мактабгача ва мактаб таълими вазирлиги, Ўзбекистон Республикаси Ёшлар агентлиги, Ёшлар иттифоқи масъул ходимлари, фахрий меҳмонлар ва ота-оналар иштирок этди.

Бугунги кунда ватан озодлиги йўлида эришилган шонли ғалабанинг тимсолига айланишга улгурган ушбу музаффар майдонда, орзулари-ю келажагини худди боболари сингари ватан равнақи ва ҳимояси йўлида боғлашга аҳд қилган ўзи жажжи бўлсада шижоатга тўла юрак эгалари бўлмиш ҳарбий ватанпарварлик синфининг ўқувчилари саф тортди. Шахсий таркибни тантанали ваъда бериш маросимига киришишига рухсат берилгач саф тортиб турган ёшлар юзидаги ҳаяжон ўрнини жиддий масъулият қиёфаси эгаллади.

Шундан сўнг майдонни халқнинг ватанпарвар фарзанди бўлиш, ўқишда, спортда ва ахлоқ-одобда ўрнак бўлиш, катталарни ҳурмат қилиш, ўз синфдошлари ва кичикларга ёрдам бериш, ўзаро мулоқотда камтар, вазмин, ориятли, сабр-тоқатли ўқувчи бўлиш, буюк саркарда ва давлат арбоби сифатида тарихда қолган аждодлар сингари ватанпарвар бўлишга, она-Ватани, халқи ва Президентга сидқидилдан хизмат қилишга ваъда бераётган 100 дан ортиқ ўқувчиларнинг баралла янграган овози тутиб кетди. Ўқувчилар томонида сидқидилдан айтилган ҳар бир сўз, ваъда бериш маросимини кузатиб турган ота-оналарнинг қалбини тўлқинлантириб кўзларидан шодлик ёшлари сизиб чиқишига сабаб бўлди.

Шу ўринда таъкидлаш жоизки, ҳозирги кунга қадар мазкур синфларининг 100 га яқин битирувчилари “Темурбеклар мактаби” ҳарбий академик лицейларининг ўқувчиси бўлганлиги қувонарли холдир.

Маросимнинг бадиий қисмида, Ўзбекистон Республикаси Миллий гвардияси алоҳида намунали кўргазмали-ҳарбий оркестри, ҳарбий мусиқа академик-лицейи ўқувчиларининг “Зарбли чолғулар ансамбли”, Жамоат хавфсизлиги университети курсантлари кўргазмали чиқишлари намойиш этилди.

Эслатиб ўтамиз, Ўзбекистон Республикаси Миллий гвардиясига бириктирилган ҳарбий-ватанпарварлик йўналишига ихтисослаштирилган синфларига қабул қилинган ўқувчиларнинг ваъда бериш маросими илк бор ўтказилгаётган бўлиб, келгусида ушбу маросим анъанага айлантирилиши кўзда тутилган.