СПОРТ ЁШЛАРНИ БИРЛАШТИРАДИ
Бугунги кунда юртимизда, давлатимиз раҳбари томонидан ёшларни ҳар томонлама қўллаб-қувватлаш, уларнинг хохиш-истакларини амалга ошириш, ўз иқтидорларини намоён этишда муносиб шарт-шароитлар яратиш борасида қатор ислоҳотлар олиб борилмоқда.
Айниқса, мазкур йўналишдаги ишларни амалга оширишда Ўзбекистон Республикасининг "Ёшларга оид давлат сиёсати тўғрисида"ги Қонуни ҳамда Президентимиз томонидан илгари сурилган бешта муҳим ташаббус муҳим омил бўлмоқда. Бу йўналишдаги вазифалар ижросини таъминлашда, Ўзбекистон Республикаси Миллий гвардияси Сурхондарё вилояти бўйича бошқармаси ҳарбий хизматчилари ҳамда вилоят Қўриқлаш бошқармаси ходимлари томонидан ҳам Сурхондарё вилоятида қатор чора-тадбирлар олиб борилмоқда.
Хусусан, куни кеча "Ватанпарварлик ойлиги" доирасида, Олтинсой туманининг чекка ҳудудларидан бири бўлган "Мустақилликнинг 10 йиллиги" маҳалласида жойлашган 13-сонли умумий ўрта таълим мактабида, туман ҳокимлиги, халқ таълим бўлими ҳамкорлигида ўтказилган тадбирда, ёшларнинг бўш вақтларини мароқли ўтказишларини таъминлаш ҳамда уларнинг ҳарбий хизматга бўлган қизиқишларини оширишга алоҳида эътибор қаратилди.
Бир гуруҳ ўқувчи ёшлар иштирок этган тадбирда, шахмат-шашка, кураш ҳамда "ким эпчил-у, ким чаққон", "қувноқ стартлар" каби спорт мусобақалари ташкил этилди. Жамоаларга бўлинган ўғил-қизлар ўз истеъдодлари ва жисмоний қобилиятларини синовдан ўтказдилар.
Қизғин кечган беллашув якунида ғолиб бўлган иштирокчиларга медал ва эсдалик совғалари туҳфа этилди.
Шунингдек, тадбир доирасида Миллий гвардия раҳбарияти томонидан 13 ҳамда 2-сонли умумий ўрта таълим мактаблари ўқитувчиларига компьютер жамланмаси совға қилинди.
Кўрсатилган бундай эътибордан, ота-оналар, устозлар, ўқувчилар жуда мамнун бўлдилар. Шундан сўнг, Миллий гвардия ҳарбий хизматчилари томонидан қўл жанги усуллари бўйича саҳна кўринишлари ҳамда ҳарбий қурол-аслаҳалар кўргазмаси ташкил этилди. Бу эса ўғил-қизлар қалбида катта таассуротлар қолдирди.
