СУРХОНДАРЁ ВИЛОЯТИДА МИЛЛИЙ ГВАРДИЯ ҲУЗУРИДАГИ ҚОРАБАЙИР ОТЛАРИ МАҲОРАТ МАКТАБИНИНГ ТАНТАНАЛИ ОЧИЛИШ МАРОСИМИ БЎЛИБ ЎТДИ
Давлатимиз раҳбарининг 2021 йил 5 август кунидаги “Сурхондарё вилоятида Қорабайир зотли отларни етиштириш ва оммалаштириш ҳамда от спорти турларини янада ривожлантириш чора-тадбирлари тўғрисида”ги Қарори доирасида, ушбу йўналишдаги ишларни янги босқичга кўтариш бўйича аниқ ва мақсадли вазифалар белгилаб берилган эди.
Миллий меросимизнинг ажралмас қисми бўлган Қорабайир зотли отларни кўпайтириш ҳамда ёшларни от спортига кенг жалб этиш, мамлакатимизда от спорти турларини янада ривожлантириш борасидаги ишлар Миллий гвардия зиммасига юклатилиб, бугунги кунда мазкур йўналишдаги чора-тадбирлар тизимли равишда амалга оширилиб келинмоқда.
Хусусан, Қорабайир отлари маҳорат мактабининг республикамизда илк маротаба Сурхондарё вилоятида очилиши ва қолган вилоятларга намуна сифатида ўз фаолиятини бошлаганлиги муҳим аҳамият касб этади.
Жорий йилнинг 2 октябрь куни Қорабайир отлари маҳорат мактабининг тантанали очилиш маросими, Миллий гвардия қўмондонлиги, ҳудудий бошқармалари масъул ходимлари, вилоят ҳокимлиги ва ОАВ вакиллари иштирокидаги видео-селектор тарзидаги Матбуот анжумани ўтказилиши билан бошланди.
Шундан сўнг, тантани маросимга ташриф буюрган меҳмонларга мазкур қарор талаблари доирасида қисқа вақт ичида амалга оширилган ишлар, маҳорат мактаби фаолияти ва истиқболли режалари, айни дамда ушбу мактабнинг таркибий тузилмаси шакллантирилиб, 50 нафар ходим ва мураббийлардан иборат мутахассислар жалб этилганлиги, шунингдек ушбу ҳудудда келажакда туризм инфратузилмаларини ташкил этилиши юзасидан маълумотлар берилди.
Мазкур туманда жойлашган Отчопар майдони тарихи ва бугунги кунда Қорабайир отлари маҳорат мактаби сифатида янги қиёфада ўз фаолиятини бошлаган қарийб 65 га ер майдонига эга бўлган ушбу муассаса тўғрисида тўлиқ маълумотга эга бўлган меҳмонлар тантанали равишда бинонинг рамзий очилишида иштирок этдилар.
Тадбирнинг иккинчи қисми Миллий гвардия мутасадди раҳбарлари томонидан очиб берилиб, унда вилоят ҳокимлиги, ҳамкор вазирлик ва ташкилотлар раҳбарлари, нуронийлар ва кенг жамоатчилик вакиллари, шунингдек, 2000 га яқин маҳаллий аҳоли ҳамда ёшлар томошабинлигида, 400 нафарга яқин воҳалик чавандозлар ва вилоят ҳарбий хизматчилари иштирокидаги миллий қадриятларимиз бўлган “От пойгаси”, “От устида кураш” ва “Улоқ-кўпкари” каби от спортларига старт берилди.
Чавандозларимиз тайёргарлик кўриш мобайнида, вилоят Камондан отиш федерацияси спортчилари ҳамда ҳарбий хизматчилар томонидан ташриф буюрган ёшларга кўргазмали чиқишлар тақдим этилди.
Шундан сўнг, қизғин ва муросасиз беллашувларга бой бўлган от спорти мусобақалари бўлиб ўтиб, унда миллий анъаналаримизга хос ҳалоллик билан эришилган якуний натижаларга кўра, ғолиб ва фаол чавандозлар ташкилотчилар томонидан муносиб рағбатлантирилди.
Таъкидлаш жоизки, амалга оширилаётган бу каби тадбирлар, юртимизда ёшларнинг миллий қадриятларимизни чуқур ўрганишлари орқали, ватанпарварлик руҳида ўсиб-улғайишига хизмат қилади.
