Таълим тарбия назорати ҳуқуқбузарлик эмас!
Ёшлар орасида ҳуқуқбузарликни олдини олиш, жамиятдаги қонунга итоатсизлик даражасини пасайтириш, айниқса вояга етмаганлар томонидан содир этилган жиноятларга қарши курашиш ва олдини олиш алоҳида аҳамиятга эга. Ёшлар ўртасида содир этилган айрим ҳуқуқбузарликлар бир неча йилдан сўнг «катталар» жиноятчилигига айланиши табиий. Жиноятчиликнинг ўсиши нафақат ислоҳотлар йўлига жиддий тўсиқ бўлиши, балки бугунги стратегик мақсадларга эришишда ҳам ўз салбий таъсирини намоён этади.
Ўзбекистонда таълим соҳасини ислоҳ этиш ёшлар орасидаги ҳуқуқбузарликларни барвақт профилактикаси давлат тараққиётининг кафолати деб ҳисоблайман. Тарихдан маълумки, ҳар бир жамият тараққиёти ва келажаги албатта давлатларнинг етакчи кучлари ҳисобланмиш ёшлар тарбияси билан чамбарчас боғлиқдир. Мамлакатимиздаги ёшларга оид давлат сиёсати эса қадимдан ота-боболаримиз томонидан шаклланиб келган асл миллий ва диний қадриятларимизнинг бугунги кундаги аҳамияти нечоғлик муҳим эканлигини кўрсатиб бермоқда.
Ёшларни турли салбий иллатлардан, ҳуқуқбузарлик ва жиноят содир этишига олиб келувчи таҳдид ва омиллардан асраб, уларга тўғри йўл кўсатмасак, эрганги кунимизга бефарқ қараган ва илдизимизга болта урган бўламиз.
Энди масаланинг туб илдизи бўлган мактабларга мурожаат этамиз. Статистикага кўра биргина 2023 йилда вояга етмаганлар томонидан содир этилган жиноятлар 3500 нафарни ташкил этса, шулардан 2280 та ҳолат мактаб ўқувчилари ҳиссасига тўғри келади. Бу албатта ватан тақдирига бефарқ бўлмаган барчани бирдай ташвишга солиши табиий. Ёшлар орасида профилактик тадбирларни амалга ошириш, хусусан сабабсиз дарсга келмаётган ўқувчиларни мактабга қайтариш мақсадида Миллий гвардия мактабларга жалб этилди. Миллий гвардия функциясига кўра ҳуқуқни муҳофаза қилувчи органлар қаторига киритилган ва “Миллий гвардия тўғрисидаги” қонуннинг 3-моддасига кўра “ҳуқуқбузарликлар профилактикасини амалга ошириш, шу жумладан мазкур ҳуқуқбузарликларнинг содир этилиши сабабларини ва уларга имкон бераётган шарт-шароитларни аниқлаш, бартараф этиш” Миллий гвардиянинг вазифаларидан саналади.
Ижтимоий тармоқларда фаолият юритаётган ва маълум даражасидаги обуначиларига эга бўлган блогерлар томонидан тарқатилаётган айрим маълумотлар асоссиз ҳисобланиб, кенг жамоатчилик ўртасида англашмовчиликнинг юзага келишига сабаб бўлмоқда.
Миллий гвардия ҳарбий хизматчи ва ходимлари мактабларда “Хавфсиз мактаб” концепциясини амалга ошириш мақсадида ўқувчиларнинг давомати, мунтазам дарс машғулотларини сабабсиз қолдираётган ўқувчиларнинг оилавий шарт-шароитларини ўрганиш, таъбир жоиз бўлса, уларнинг ижтимоий аҳволини яхшилаш борасида ижобий ишларни амалга оширмоқдалар.
Ҳурматли блогерлар, муносабат билдираётган фикрингиз аҳоли ўртасида турли тушунмовчиликлар келиб чиқишига эмас балки Сизнинг ва барчамизнинг фарзандларимиз таълим-тарбиясини яхшилашга мамлакат тараққиётига хизмат қилишини хоҳлардик.
Миллий гвардия ўз фаолиятини қонуний асосларда олиб бормоқда. Мамлакат эртанги куни бўлган ёшлар масалаларига берилаётган эътиборни баъзи ижтимоий тармоқларда нотўғри талқин қилиниши ўз навбатида халқимиз ва Ватанимиз эртанги куни бўлган ёшларни истиқболи йўлида яқиндан ёрдам бераётган давлат ташкилотларининг иштироки тўғрисида аҳолида нотўғри тушунча пайдо бўлишига сабаб бўлиши мумкин.
Асоссиз ахборотларни тарқатишдан тийилинг!
