Тошкент шаҳрининг Юнусобод Универсал спорт мажмуасида "14 январь - Ватан ҳимоячилари куни" муносабати билан хизмат вазифасини бажариш чоғида қаҳрамонларча ҳалок бўлган ҳарбий хизматчи ва ходимлар хотирасига бағишланган қўл жанги бўйича Қуролли Кучлар чемпионати бўлиб ўтди.
Ўзбекистон Республикаси Президентининг 2022 йил 20 июндаги “Қўл жанги спорт турини янада ривожлантириш чора-тадбирлари тўғрисида”ги ПҚ-287-сон қарори асосида ҳар йили ўтказиб келинаётган мазкур чемпионатга бу йил Ички ишлар вазирлиги мезбонлик қилди.
Шу муносабат билан, чемпионатнинг финал жангларини очилиш маросимида Ички ишлар вазири генерал-лейтенант А.Ташпулатов ҳамда Ўзбекистон ҳуқуқни муҳофаза қилиш органлари қўл жанги федерацияси раиси – Миллий гвардия қўмондони генерал-майор Р.Джураевлар сўзга чиқиб, барча иштирокчиларга ва спортчиларга омад ёр бўлишини тилаган ҳолда самимий тилакларини билдиришди.
Ўзбекистон мадҳияси билан кўтаринки руҳда бошланган чемпионатнинг бадиий қисмида ватанни мадҳ этувчи ҳамда хизмат вазифасини бажариш чоғида қаҳрамонларча ҳалок бўлган ҳарбий хизматчи ва ходимлар хотирасига бағишланган куй ва қўшиқлар, шунингдек кўргазмали чиқишлар намойиш этилди.
Чемпионатнинг финал баҳсларида Ички ишлар вазирлиги, Миллий гвардия, Президент Давлат хавфсизлик хизмати, Давлат хавфсизлиги хизмати, Божхона қўмитаси, Мудофаа ҳамда Фавқулодда вазиятлар вазирлиги жамоaлари ўртасида муросасиз ва қизғин беллашувлар остида бўлиб ўтган ҳар бир жанг ҳакамлар томонидан адолатли баҳоланиб борилди.
Шуни алоҳида таъкидлаш жоизки бу йил Фавқулодда вазиятлар вазирлиги жамоаси спортчилари юқори даражадаги жисмоний тайёргарлигини намоён этишди, хусусан ушбу жамоанинг аъзоси бўлган Маржона Файзуллаеванинг олтин медални қўлга киритиб тарихий ғалабага эришганлиги фикримизнинг ёққол далилидир.
Аслида мазкур мусобақада қизлар ўртасидаги жанглар мухлис ва мутахассисларнинг эътирофига сазовор бўлганлигини алоҳида қайд этиб ўтиш лозим. Жумладан, гвардиячи қизлар Нилуфар Полвонова ҳамда Гулнура Сеиджоноваларнинг ҳам юқори маҳоратлари уларнинг олтин медалларни қўлга киритишига сабаб бўлди. Шу каби турли вазн тоифаларида беллашган қизлар қўл жангининг ўзига хос жиҳатларини яққол ифода этишди.
Чемпионатнинг якуний натижаларига кўра, умумий ҳисобда 3-ўринни (1 та олтин, 1 та кумуш ва 2 та бронза медали билан) Президент Давлат хавфсизлик хизмати ва (1 та кумуш ва 3 та бронза медали билан) Мудофаа вазирлиги жамоалари, 2-ўринни (3 та олтин ва 2 та кумуш медали билан) Давлат хавфсизлик хизмати жамоаси эгаллаган бўлса, фахрли биринчи ўринни (4 та олтин ва 4 та кумуш медали билан) Ички ишлар вазирлиги жамоаси қўлга киритди.
Тантанали тақдирлаш маросимида Ўзбекистон Республикаси Президенти ҳузуридаги Хавфсизлик кенгаши котиби В. Маҳмудов ва унинг ўринбосари Б. Тошматов, Ички Ишлар вазири А. Ташпулатов, Ўзбекистон ҳуқуқни муҳофаза қилиш органлари Қўл жанги федерацияси раиси – Миллий гвардия қўмондони Р. Джураев, Ўзбекистон Республикаси Бош прокурори Н.Йўлдошев, Давлат хавфсизлиги хизмати раиси Б. Қурбонов, Мудофаа вазири Ш. Халмухамедов, Фавқулодда вазиятлар вазири Б. Кудратходжаев, Божхона қўмитаси раиси А. Мавлонов, Президент Давлат хавфсизлик хизмати раиси ўринбосари А. Мўминов, Спорт вазири ўринбосари Ш.Маҳмудовлар иштирок этиб, ғолибларга кубок, медаль, диплом ва қимматбаҳо совғаларни топширишди.
Шу тариқа Ички ишлар вазирлиги мусобақа байроғини Божхона қўмитасига топширди.
Чемпионатда фаол иштирок этган Куч тузилмалари спортчилари ва уларнинг мураббийларини Қўл жанги федерацияси раҳбарияти номидан самимий муборакбод этамиз!
