Бола табассуми – олам безаги. Айниқса, “Халқаро болаларни ҳимоя қилиш куни”да юртимиз уларнинг самимий ва беғубор кулгуси билан янада яшариб кетади. Чунки ҳеч бир ўғил-қиз меҳрдан, эътибордан четда эмас. Ушбу байрам арафасида Чирчиқ шаҳридаги 14-сонли Меҳрибонлик уйининг эшиклари ёпилиб, кўпчилик ёшларнинг мустақил ҳаётга қадам қўйиши тантанали нишонланди.
Хабарингиз бор, бугунга қадар республикамизда 22 та Меҳрибонлик муассасаларининг фаолияти тугатилган. 800 нафарга яқин қора кўзлар бугун 140 та Оилавий болалар уйларида тўла-тўкис камолга етмоқда. Шунингдек, Меҳрибонлик уйлари битирувчиларининг 211 нафари олий ва ўрта-махсус таълим муассасаларида таҳсил олишмоқда. Ёшлар билан ишлашнинг янгича тизими доирасида Давлатимиз раҳбари томонидан белгилаб берилган вазифалар ижроси амалда изчиллик билан тадбиқ этиляпти. Тошкент вилояти Чирчиқ шаҳридаги Меҳрибонлик уйининг 30 нафар ўғил-қизлари сўнгги қўнғироқ садолари остида мактабни тугатиб янги ҳаётга қадам қўймоқда.
Битувчилар умумтаълим мактабида устоз ва тарбиячиларидан билим ва кўникмаларни эгаллашди, энди юртбошимиз томонидан яратиб берилаётган имконият ва шароитлардан фойдаланган ҳолда, пойтахтимиздаги ўрта-махсус ва олий таълим муассасаларида ўқишни давом эттиришади. Уларнинг кўпчилиги ҳарбий таълим муассасаларини танлаган. Бу эса уларда Ватанпарварлик туйғулари юқори эканлигидан далолат.
14-сонли Меҳрибонлик уйида болалар сони кескин камайгани ҳисобга олиниб, муассаса оптималлаштирилган ҳолда қолган 30 дан ортиқ тарбияланувчилар Тошкент шаҳридаги 150 сиғимга эга бўлган 22-сонли Меҳрибонлик уйига жойлаштирилди. Шу билан бирга, 48 нафар ишчи – хизматчиларнинг бандлигини таъминлаш чоралари кўрилган. Ушбу бино эса келгусида Мактабгача ва мактаб таълими вазирлиги режасига асосан Илмий-тадқиқот маркази сифатида фойдаланиши кўзда тутилган.
Шу муносабат билан 1 июнь - Халқаро болаларни ҳимоя қилиш куни арафасида Тошкент вилояти Чирчиқ шаҳридаги 14-сонли Меҳрибонлик уйи ҳам тугатилди. Бу эса республика бўйлаб фаолияти тугатилган йигирма учинчи муассаса ҳисобланади.
-Биз 22-сонли Меҳрибонлик уйидаги тенгдошларимиз билан ҳамма тадбирларда бирга иштирок этиб, дўстлашиб олганмиз. Фақат бир-биримиздан узоқда эдик. Мана энди янаям яқин бўлдик ва бундан жудаям хурсандмиз дейди 14-сонли Меҳрибонлик уйи тарбияланувчиси бўлган 13 ёшли Озодахон.
-Албатта, энди бирга мактабга борамиз, дарс тайёрлаймиз, яқинда оромгоҳга кетамиз дея хурсандчилигини билдирди 22-сонли Меҳрибонлик уйи тарбияланувчиси 13 ёшли Робия.
22-сонли Меҳрибонлик уйида байрам муносабати билан маданий тадбирлар ўтказилди, тарбияланувчилардан хабар олиниб, турли совғалар улашилди. Ёз мавсумида уларни сўлим оромгоҳлар кутмоқда. Болажонлар ушбу масканларда мароқли ҳордиқ чиқарадилар, эгаллаган билимларини турли тўгаракларда янада мустаҳкамлаб қайтишади.
