НАВРЎЗ БАЙРАМИНИ НИШОНЛАШДА ЖАМОАТ ТАРТИБИ ВА ФУҚАРОЛАР ХАВФСИЗЛИГИ ИШОНЧЛИ ТАЪМИНЛАНДИ
Мамлакатимизда халқнинг севимли байрами-Наврўз кенг нишонланди. Жорий йилда Президентимиз фармонига мувофиқ байрам тадбирлари “Ассалом, Наврўз – янгиланиш, меҳр-оқибат ва қадр-қиммат айёми!” шиори остида ўтказилди.
Юртдошларимиз ҳамда яқин ва узоқ хорижий давлатлардан келган кўплаб меҳмонларимиз шаҳар, туман ва чекка қишлоқлардаги 240 дан ортиқ масканларларда бўлиб ўтган байрамларда, халқ сайллари ва анъанавий миллий ўйинларда, амалий санъат усталаридан тортиб замонавий рассомлар иштирокидаги кўргазмаларда ҳамда концертлар ва баҳорий озиқ-овқат ярмаркаларида қатнашди. Байрам тантаналарида жами 1 миллион 440 мингдан ортиқ фуқаролар иштирок этди.
Давлатимиз раҳбари томонидан Наврўз байрами муносабати билан дам олиш куни деб эълон қилинган беш кун давомида Миллий гвардия ҳарбий хизматчи ва ходимлари, Ички ишлар вазирлиги, Фавқулодда вазиятлар вазирлиги ва бошқа ҳуқуқни муҳофаза қилиш органлари ходимлари бутун мамлакат бўйлаб жамоат хавфсизлиги ва ҳуқуқ-тартиботни ишончли таъминладилар.
Шу билан бир қаторда, Миллий гвардия қўмондонлиги ва ҳарбий хизматчилари томонидан иккинчи Жаҳон уруши фахрийлари, кекса авлод вакиллари, "Меҳрибонлик" ва "Мурувват" уйи тарбияланувчилари, "Саховат" уйларида яшовчи шунингдек,"темир", "аёллар"," ёшлар " дафтарларига киритилган фуқаролар учун байрамга бағишланган хайрия тадбирлари ўтказилди.
Баҳор ва янгиланиш байрами муносабати билан давлатимиз раҳбари ва халқига йўлланган табрикларда иқтисодий, сиёсий, ҳуқуқий ҳамда бошқа соҳаларда амалга оширилаётган туб ислоҳотлар самарасида мамлакатимиз бугунги кунда бутун Марказий Осиё давлатларининг байроқдорига айланиб бораётгани алоҳида эътироф этилиб, шу билан бир қаторда, хорижий давлатлар вакиллари Ўзбекистон эришаётган ютуқлар қаторида муборак заминимизда ҳукм сураётган тинчлик ва осойишталикни алоҳида таъкидламоқда.
Хорижий дўстларимиз ва ҳамкорларимизнинг бу сўзлари ҳамда юртдошларимизнинг чеҳрасидаги табассум - Тинчлик ва халқ фаровонлиги, Ватанимиз хавфсизлиги ва равнақи шунингдек, инсон ҳуқуқларини ҳимоя қилиш йўлида хизмат қилаётган Миллий гвардия, Ички ишлар вазирлиги ва бошқа тузилмаларнинг ҳарбий хизматчи ва ходимларига берилган миннатдорлик ифодасидир.
