Наманган вилоятида Қуролли кучлар тизимида хизмат қилаётган ҳарбий хизматчи ва ходимлар ҳамда уларнинг оила аъзолари иштирокида оммавий сайёр қабул ўтказилди.
Наманган шаҳридаги Маданият марказида бўлиб ўтган қабулда Миллий гвардия қўмондонлиги, Республика ҳарбий прокуратураси ҳарбий хизматчи ва ходимлари, шунингдек, уларнинг оила аъзолари иштирок этишди.
Очиқ мулоқот аввалида Қуролли кучлари тизимида амалга оширилаётган ислоҳотлар, ҳарбий хизматчи ва ходимлар учун яратилаётган шарт-шароитлар ҳамда имкониятлар хусусида сўз юритилди.
Сайёр қабул давомида 100 га яқин фуқаролардан турли йўналишлар бўйича мурожаатлар келиб тушди. Хизмат вақтида вафот этган ҳарбий хизматчи ва ходимлар оила аъзоларининг бандлигини таъминлашда амалий ёрдам сўраб мурожаат қилган фуқароларнинг муаммолари жойида ижобий ҳал этилди.
Қабул сўнггида йиғилганларга барча мурожаатлар бўйича қонун ҳамда норматив ҳуқуқий ҳужжатлар доирасида тушунчалар берилди. Шунингдек, тегишли соҳавий хизмат раҳбарларига мурожаатларни кўриб чиқишлари учун кўрсатма ва топшириқлар берилиб, аниқ муддатлар белгиланди.
Таъкидлаш жоизки, бу каби сайёр қабуллар ҳарбий хизматчи ва ходимлар, шунингдек, уларнинг оила аъзоларини ҳуқуқ ва эркинликларини, қонуний манфаатларини амалга оширишда дуч келган муаммоларни ижобий ҳал этишга кенг замин яратмоқда.
