Миллий гвардия ҳарбий хизматчилари Чорсу бозорида ўғриликда гумонланувчи шахсни қўлга олишди
10 август куни Чорсу бозорида хатти-ҳаракатлари шубҳали бўлган, кепка ва қора тиббий ниқоб кийган фуқаро ҳудудда хизмат олиб бораётган Миллий гвардия Тошкент шаҳри бўйича бошқармаси ҳарбий хизматчиларининг эътиборини тортади. Мазкур фуқаро қўлга олиниб, шахси текширилганда, у томонидан бозор ҳудудида уяли телефон аппаратини ўғирлаганлиги ҳолати кузатув камераларига муҳрланганлиги аниқланди.
Қўлга олинган 45 ёшли А. Д.нинг муқаддам Ўзбекистон Республикаси Жиноят Кодексининг 169-моддаси ("Ўғрилик") бўйича судланганлиги маълум бўлди. Шахсий текширув вақтида А. Д.дан унга тегишли бўлмаган иккита сим-карта ва флешка топилиб, холислар иштирокида олиб қўйилди.
Ҳозирда Шайхонтоҳур тумани ИИО ФМБ томонидан терговга қадар текширувлар ўтказилмоқда.
