Ватан ҳимоячиси қалбидаги барқарорлик — оила ва юрт тинчлиги пойдевори
Бугунги кунда мамлакатимизда Ватан ҳимоячисидек муқаддас ва шарафли касб эгаси бўлишга бел боғлаган ўғил-қизларнинг жисмоний ва маънавий-руҳий барқарорлигини таъминлаш, уларнинг самарали хизмат қилишлари учун, ижтимоий қўллаб-қувватлаш давлат сиёсатининг устувор йўналишларидан биридир.
Хусусан, Миллий гвардия тизимида қўмондонлик томонидан шахсий таркибнинг жанговар ва жисмоний тайёргарлигини ошириш, психологик ҳолатини мустаҳкамлаш ва хизмат жараёнида юзага келиши мумкин бўлган турли стресс ҳолатларига бардошлилигини кучайтиришга алоҳида эътибор қаратилиб, зарур ва тизимли чора-тадбирлар белгилаб олинган.
Мазкур йўналишда тизимида кўплаб амалий ишлар, психологик семинар ва тренинглар, маънавий-маърифий учрашувлар мунтазам ўтказиб келинмоқда. Ана шундай тадбирлардан бири Бухоро шаҳрида Миллий гвардия тизимидаги психолог мутахассислар, шунингдек ҳарбий хизматчилар ва уларнинг оила аъзолари билан ишлаш гуруҳи офицерлари билан ташкиллаштирилиб, "Ватан ва оила ҳимояси учун ҳам – кучли ва соғлом бўлиш зарур" ҳамда “Шахсларда руҳий барқарорлик муаммолари ва унинг профилактикаси” мавзусида икки кунлик ўқув йиғини бўлиб ўтди.
Йиғин давомида гвардиячилар ва уларнинг яқинларига психологик ёрдам кўрсатишнинг замонавий усуллари, стрессни бошқариш, ижтимоий-психологик муаммоларни эрта аниқлаш ва бартараф этиш йўллари бўйича амалий машғулотлар олиб борилди. Тадбирнинг асосий мақсади — иштирокчиларнинг касбий маҳоратини ошириш, руҳий барқарорликни таъминлашга қаратилган психологик ёндашувларни мустаҳкамлашдан иборат бўлди.
Мазкур тадбирда Ўзбекистонда хизмат кўрсатган ёшлар мураббийси, “Шуҳрат” ордени соҳиби, Халқ депутатлари Тошкент шаҳар кенгаши депутати, фалсафа фанлари доктори, профессор Ж. Шермуҳаммедова иштирок этди.
Семинар давомида жамоадаги мулоқот маданияти, ўзаро ишонч ва ҳамкорликнинг инсон ҳаётидаги ўрни ҳақида таҳлилий тавсиялар берилди. Профессор Шермуҳаммедова мураккаб вазиятларда тўғри мулоқот қилиш, низоларни бартараф этиш, руҳий мувозанатни сақлаш ва ижобий иш муҳитини шакллантириш бўйича иштирокчиларга фойдали тавсиялар берди.
Тренинг доирасида замонавий психологик ёндашувлар, стрессни бошқариш техникалари, мотивацион методлар ва шахсий салоҳиятни рўёбга чиқариш мавзуларида интерактив машғулотлар ташкил этилди. Иштирокчилар билан очиқ мулоқотлар олиб борилиб, уларнинг касбий ва шахсий ҳаётидаги муҳим масалалар юзасидан индивидуал тавсиялар берилди.
