ЯНГИ ТИЗИМ ОРҚАЛИ УЛКАН МАРРАЛАР САРИ
Бугун 12 август куни Миллий гвардия қўмондони генерал-майор Р.Джураев раислигида “Етим болалар ва ота-она қарамоғидан маҳрум бўлган болаларни давлат томонидан қўллаб-қувватлашнинг янги тизимини жорий этиш чора-тадбирлари тўғрисида”ги Президент қарорининг ижросига бағишланган навбатдаги видеоселектор йиғилиши бўлиб ўтди.
Олдин хабар қилганимиздек, мазкур қарорни мазмун-моҳиятини етказиш мақсадида ҳамкор вазирлик ва ташкилотлар мутасаддилари иштирокида видеоселектор бўлиб ўтган эди. Бугунги йиғилишда Миллий гвардия таркибий ва ҳудудий бўлинмалари бошлиқлари ва ушбу йўналишга масъул ҳарбий хизматчи ва ходимлар иштирок этдилар.
Йиғилиш мобайнида Миллий гвардия қўмондони томонидан мазкур қарорда белгилаб берилган аниқ вазифалар ва мақсадли йўналишларга тўхталиб ўтилди. Шу вазифалар юзасидан жорий қилинган янги тизимга асосан, Миллий гвардия қўмондонининг ўринбосари ҳамда янги ташкил қилинган биринчи бошқарма бошлиғи лавозимига полковник А.Пирматов ва иккинчи бошқарма бошлиғи лавозимига полковник З.Абдуллаевлар тайинланганлиги маълум қилинди.
Шунингдек, Миллий гвардия тизимида янги жорий қилинган иккита йўналиш "Меҳрибонлик" болалар муассасалари билан ишлаш ҳамда Ёшлар ўртасида ҳарбий-ватанпарварлик ва спорт ишлари бошқармаларнинг асосий вазифаларига алоҳида урғу берилди.
Жойлардаги раҳбарлар томонидан қисқа муддатларда республика бўйича Меҳрибонлик уйлари директори ўринбосарлари ҳамда Чавандозлик мактаблари директори лавозимларига Миллий гвардия тизимида хизмат қилиб келаётган муносиб номзодлар ўрганилиб, ўрнатилган тартибда тайинланишлари юзасидан топшириқлар берилди.
Қарорлар ижроси юзасидан ишлаб чиқилган йўл хариталарида кўрсатилган чора-тадбирларнинг белгиланган муддатларда бажарилиши ҳамда ушбу йўналишларда амалга ошириладиган ишларни ОАВ да мунтазам ёритилиб, буюк ўзбек халқининг “Битта фарзандга етти маҳалла ота-она” деган зарҳал ҳарфлар билан битилган ва бизгача маънавий мерос бўлиб етиб келган муқаддас қадриятларимизни ёд олган ҳолда, меҳрибонлик уйларидаги болажонларга бўлган қарашимизни ва эътиборимизни ўзгартиришимиз кераклигини тарғиб қилиш учун Ахборот хизматига тавсиялар берилди.
Шунингдек, Оилавий болалар уйларини ташкил этишда фуқароларга кўмаклашиш ҳамда “Меҳр дафтари”га киритиладиган болаларни маънан, моддий ва ижтимоий қўллаб қувватлаш орқали уларнинг ёрқин келажагини яратиб бериш ишларини Маҳалла ва оилани қўллаб-қувватлаш вазирлиги, Касаба уюшмалари билан биргаликда амалга ошириш юзасидан вазифалар белгиланди.
Йиғилишда сўз олганлар томонидан давлатимиз раҳбари томонидан қабул қилинган мазкур қарорларнинг тарихий аҳамиятига урғу берилиб, Меҳрибонлик уйлари тарбияланувчилари учун жорий қилинган ушбу янгича тизим, уларни ҳаётда ўз ўринларини топишлари ҳамда Миллий гвардия кўмагида улкан марраларга эришишлари учун муҳим омил бўлиб хизмат қилишига ишонч билдирилди.
