Юртимиз бўйлаб пиротехника воситаларининг ноқонуний савдосига қарши чора-тадбирлар амалга оширилмоқда
Бир куннинг ўзида – 18 ноябрь куни Тошкент ҳамда икки туманда Миллий гвардия ҳарбий хизматчи ва ходимлари томонидан пиротехника воситаларининг ноқонуний савдоси бўйича учта маълумот аниқланди.
Шайхонтоҳур тумани Чорсу бозорида зангиоталик 18 ёшли Х.Ж. ноқонуний пиротехника маҳсулотларини сотаётган вақтда қўлга олинди. Текширув давомида жами 38 қути икки хил пиротехника воситалари ашёвий далил сифатида олиб қўйилди.
Шунингдек, Бектемир туманида жиззахлик 19 ёшли У.Ж ҳам "Бомба" деб номланган 20 қути пиротехника воситаларини сотаётган вақтида ушланди.
Бундан ташқари, ангренлик 20 ёшли У.С "Сompass" савдо мажмуасида ташриф буюрувчиларга пиротехника маҳсулотларини таклиф қилаётганда мазкур ҳудудда хизмат олиб бораётган ҳарбий хизматчилар томонидан қўлга олинди. Текширув вақтида фуқаро У.С.нинг ёнида 10 қути "Britanik" номли пиротехника воситалари мавжудлиги аниқланди.
Юқорида қайт этилган ҳолатлар юзасидан ҳар бир ҳуқуқбузарга Ўзбекистон Республикасининг Маъмурий жавобгарлик тўғрисидаги кодексининг 185-1-моддаси бўйича маъмурий баённомалар расмийлаштирилди.
Ҳурматли юртдошлар, сиздан соғлиғингизга ва айниқса, болалар саломатлиги ва хавфсизлигига жиддий муносабатда бўлишингизни сўраймиз: ноқонуний пиротехника сотиб олманг ва болаларингизнинг хати-ҳаракатларига эътиборли бўлинг.
Унутманг, пиротехника воситалари билан ўйнаш жиддий жароҳатлар ва аянчли ҳолатлар билан якунланади.
