Ўзбекистон мезбонлигида Марказий Осиёнинг Қозоғистон, Қирғизистон ва Тожикистоннинг энг кучли 10 та жамоалари иштирокидаги “Буюк Ипак йўли” Армия ва Полиция волейбол чемпионати бўлиб ўтди ва унда Миллий гвардия жамоаси фахрли ўринни эгаллади.
Янги Наманган туманидаги “Паҳлавон” спорт мажмуасида CAVA “Buyuk Ipak yo‘li” Army and Police Volleyball Championship халқаро турнири ўтказилди. Бир ҳафта давом этган кескин ва муросасиз беллашувлар ўз якунига етиб, мусобақанинг энг кучли жамоалари аниқланди.
Мусобақа натижаларига кўра:
1-ўрин — “Матонат” (ДХХ)
2-ўрин — “Ҳумо” (ИИВ)
3-ўрин — “Гвардия” (МГ)
Миллий гвардия жамоаси мусобақа давомида ўзининг жипслиги, қатъияти ва професционал маҳоратини намойиш этиб, фахрли ўринлардан бирини эгаллади.
Тадбир сўнгида ғолиб ва совриндор жамоаларга ташкилотчилар томонидан махсус кубоклар, сертификатлар, медаллар ҳамда эсдалик совғалари топширилди.
Мазкур нуфузли турнир Марказий Осиё давлатлари ўртасида спорт соҳасидаги ҳамкорликни мустаҳкамлаш, дўстона алоқаларни ривожлантириш ҳамда волейбол спорт турини янада оммалаштиришда муҳим аҳамият касб этади.
