ЎЗБЕКИСТОН РЕСПУБЛИКАСИ ЖАМОАТ ХАВФСИЗЛИГИ УНИВЕРСИТЕТИДА ХАЛҚАРО ОНЛАЙН ИЛМИЙ-АМАЛИЙ КОНФЕРЕНЦИЯ ЎТКАЗИЛДИ
Ўзбекистон Республикаси Жамоат хавфсизлиги университетида “Замонавий дунёда ёшларнинг ўрни: олий таълим муассасаларида ҳарбий фан ривожланишининг тажрибаси, муаммолари ва истиқболлари” номли халқаро онлайн илмий-амалий конференцияси бўлиб ўтди. Халқаро конференцияни Ўзбекистон Республикаси Жамоат хавфсизлиги университети бошлиғи, юридик фанлар доктори, профессор Рустамбаев Мирзаюсуп Хакимович ўз кириш сўзи билан очиб берди.
Халқаро конференцияда Беларусь Республикаси, Жанубий Корея Республикаси, АҚШ, Ҳиндистон, Хитой Халқ Республикаси, Туркия, Россия Федерацияси, Қозоғистон, Буюк Британия давлатларининг машҳур олий ҳарбий таълим муассасалари профессорлари, олимлари, ҳуқуқ-тартибот тизими ходимлари, фан соҳаси мутахассислари ҳамда хориждаги Ҳарбий атташе вакиллари, шунингдек, республикамизнинг 8 та олий ҳарбий таълим муассасалари профессор-ўқитувчилари, иқтидорли курсантлари иштирок этди.
Халқаро конференцияда олий ҳарбий таълим муассасаларида ҳарбий фан ривожланишининг муаммоларини ва истиқболларини муҳокама қилиш учун кенг мунозарали муҳитини яратиш, курсантларни тайёрлаш жараёнида ривожланган хорижий мамлакатларнинг олий таълим муассасаларида ҳарбий фан ривожланишининг тажрибасини, муаммоларини ва истиқболларини ўрганиш, курсантларда илмий тадқиқотларни олиб боришга мотивацияни, аналитик ва танқидий фикрлашни шакллантириш, олий ҳарбий таълимда ва фанда рақобатбардош муҳитини яратиш, мустақил фикрлашга қодир бўлган, халқаро стандартларга мувофиқ замонавий билим ва кўникмаларга эга юқори малакали профессионал кадрларни тайёрлаш масалалари муҳокама қилинди.
Халқаро анжуман давомида Жамоат хавфсизлиги университети “Алвон беретлар” бадиий ҳаваскорлик жамоасининг мусиқали чиқишлари намойиш этилди. Шундан сўнг халқаро илмий анжуман иштирокчилари университет курсантларининг рационализаторлик фаолияти билан яқиндан танишиб чиқишга муваффақ бўлдилар.
Тадбир якунида иштирокчиларга ҳарбий фанларни ўқитиш методикасини такомиллаштириш бўйича таклиф ва тавсиялар тақдим этилди. Шунингдек, бундай анжуманларни мунтазам равишда ўтказиш, халқаро ҳамда маҳаллий олий ҳарбий таълим муассасалари ўртасидаги икки томонлама ҳамкорликни янада ривожлантириб, тажриба алмашиш учун имконият яратиши таъкидланди.
Конференция натижаларига кўра ушбу тадбир иштирокчиларининг мақола ва тезислари тўпламини чиқариш режалаштирилган бўлиб, унда олий ҳарбий таълим муассасаларида ўқув-услубий жараённи янги босқичга кўтариш, ҳарбий фанларни ўқитишда замонавий услублардан унумли фойдаланиш бўйича тавсия ва таклифлар тақдим этилади.
