O‘zbekiston Respublikasi Milliy gvardiyasi va Turkiya Jandarmeriyasining xalqaro hamkorligi mustahkamlanmoqda
Joriy yilning 7-11 aprel kunlari Turkiya Jandarmeriyasi Bosh qoʻmondoni oʻrinbosari general-polkovnik Ismail Balibek boshchiligidagi Turkiya Jandarmeriyasi delegatsiyasining Oʻzbekiston Respublikasiga tashrifi tashkil etildi.
Eslatib oʻtamiz, 2021-yilning noyabr oyida Oʻzbekiston Respublikasiga tashrif buyurgan Turkiya respublikasi Jandarmeriyasi Bosh qoʻmondoni armiya-generali Arif Chetin va Milliy gvardiya qoʻmondoni general-mayor Rustam Djurayevning uchrashuvi boʻlib oʻtib, unda Oʻzbekiston Milliy gvardiyasi va Turkiya Jandarmeriyasi oʻrtasidagi hamkorlik aloqalarini rivojlantirish boʻyicha istiqbolli rejalar belgilab olingan edi.
Ikki tomonlama oʻzaro hamkorlik masalalari yildan yilga mustahkamlanib kelinmoqda, xususan xavfsizlik sohasi, harbiy kadrlarni tayyorlash va qayta tayyorlash hamda malakasini oshirish kabi yoʻnalishlardagi oʻzaro tajriba almashinuvlari bugungi kunda yangi bosqichga olib chiqildi.
Mazkur amaliy hamkorlikning dolzarb yoʻnalishlarida amalga oshirilayotgan tizimli ishlar hamda oʻrnatilgan mustahkam strategik sheriklik munosabatlari, joriy yilning 8 aprel kuni Milliy gvardiya qoʻmondoni general-mayor R.Djurayev va Turkiya Jandarmeriyasi Bosh qoʻmondoni oʻrinbosari general-polkovnik Ismail Balibeklar oʻrtasida boʻlib oʻtgan ishchi uchrashuv mobaynida keng muhokama qilindi.
Turk tomoni soʻngi yillarda ikki tomonlama hamkorlik doirasida erishilgan natijalar hamda davom ettirilayotgan amaliy tadbirlarni yuqori baholab, kelgusida ham hamkorlikni yanada kengaytirishga manfaatdor ekanliklarini bildirib oʻtishdi.
Tashrif dasturiga muvofiq delegatsiya aʼzolarini Oʻzbekiston Respublikasi Milliy gvardiyasi muzeyi, Maʼnaviyat va maʼrifat markazi, Milliy gvardiya Bolalar psixologiyasi markazi, Axborot xizmati, “Temurbeklar” harbiy akademik litseyi hamda Jamoat xavfsizligi universitetiga tashrifi amalga oshirildi.
Tashrif oʻzaro hurmat va ishonch ruhida boʻlib oʻtdi.
