Ўзбекистон Республикаси Миллий гвардияси ва Туркия Жандармериясининг халқаро ҳамкорлиги мустаҳкамланмоқда
Жорий йилнинг 7-11 апрель кунлари Туркия Жандармерияси Бош қўмондони ўринбосари генерал-полковник Исмаил Балибек бошчилигидаги Туркия Жандармерияси делегациясининг Ўзбекистон Республикасига ташрифи ташкил этилди.
Эслатиб ўтамиз, 2021 йилнинг ноябрь ойида Ўзбекистон Республикасига ташриф буюрган Туркия республикаси Жандармерияси Бош қўмондони армия-генерали Ариф Четин ва Миллий гвардия қўмондони генерал-майор Рустам Джураевнинг учрашуви бўлиб ўтиб, унда Ўзбекистон Миллий гвардияси ва Туркия Жандармерияси ўртасидаги ҳамкорлик алоқаларини ривожлантириш бўйича истиқболли режалар белгилаб олинган эди.
Икки томонлама ўзаро ҳамкорлик масалалари йилдан йилга мустаҳкамланиб келинмоқда, хусусан хавфсизлик соҳаси, ҳарбий кадрларни тайёрлаш ва қайта тайёрлаш ҳамда малакасини ошириш каби йўналишлардаги ўзаро тажриба алмашинувлари бугунги кунда янги босқичга олиб чиқилди.
Мазкур амалий ҳамкорликнинг долзарб йўналишларида амалга оширилаётган тизимли ишлар ҳамда ўрнатилган мустаҳкам стратегик шериклик муносабатлари, жорий йилнинг 8 апрель куни Миллий гвардия қўмондони генерал-майор Р.Джураев ва Туркия Жандармерияси Бош қўмондони ўринбосари генерал-полковник Исмаил Балибеклар ўртасида бўлиб ўтган ишчи учрашув мобайнида кенг муҳокама қилинди.
Турк томони сўнги йилларда икки томонлама ҳамкорлик доирасида эришилган натижалар ҳамда давом эттирилаётган амалий тадбирларни юқори баҳолаб, келгусида ҳам ҳамкорликни янада кенгайтиришга манфаатдор эканликларини билдириб ўтишди.
Ташриф дастурига мувофиқ делегация аъзоларини Ўзбекистон Республикаси Миллий гвардияси музейи, Маънавият ва маърифат маркази, Миллий гвардия Болалар психологияси маркази, Ахборот хизмати, “Темурбеклар” ҳарбий академик лицейи ҳамда Жамоат хавфсизлиги университетига ташрифи амалга оширилди.
Ташриф ўзаро ҳурмат ва ишонч руҳида бўлиб ўтди.
