Миллий гвардия ҳамда Республика Маънавият ва маърифат маркази ҳамкорлигида “Янги замон дунёқарашини шакллантиришда гвардиячиларни менежментлик маҳорати” мавзусида Қашқадарё вилоятида семинар-тренинг ўтказилди.
Тадбир замонавий бошқарув тамойилларини ўрганиш, ходимларнинг касбий тайёргарлиги ва ички маданиятини ошириш, шунингдек, жамоа бошқаруви ва самарали мулоқот кўникмаларини ривожлантиришга қаратилди. Унда Миллий гвардия Қашқадарё вилояти бўйича бошқармаси ҳамда ҳамкор ҳуқуқни муҳофаза қилувчи органлар ҳарбий хизматчи ва ходимлари иштирок этди.
Семинарни халқаро тоифадаги спикер, фалсафа фанлари доктори, профессор, ижтимоий психолог, Тошкент шаҳар кенгаши депутати ҳамда Ўзбекистонда хизмат кўрсатган Ёшлар мураббийи Жамила Шермуҳамедова олиб борди. У ўз маърузаларида глобаллашув жараёнида давлат хизматчиларининг замонавий фикрлаши, раҳбарлик маданияти, инсон омилининг аҳамияти ҳамда муаммоларни менежмент ёндашуви орқали ҳал этиш бўйича муҳим ғояларни таъкидлади. Шунингдек, иштирокчиларга стрессни бошқариш, жамоада соғлом психологик муҳит яратиш, лидерлик фазилатларини ривожлантириш ва хизмат жараёнида коммуникация самарадорлигини ошириш юзасидан амалий машғулотлар ўтказилди.
Учрашув давомида ҳарбий хизматчилар ўзларини қизиқтирган саволлар билан мурожаат қилиб, профессионал фаолиятни такомиллаштиришга қаратилган тавсиялар олдилар. Семинар-тренингнинг аҳамияти шундаки, у нафақат ходимларнинг касбий салоҳиятини мустаҳкамлайди, балки уларнинг ижтимоий фаоллиги, маънавий дунёқараши ва жамоавий ишда масъулиятини янада оширишга хизмат қилади.
Тадбирдан сўнг иштирокчилар учун Қатағон қурбонлари музейига экскурсия ташкил этилди. Экскурсия давомида ҳарбийлар музейда сақланаётган тарихий ҳужжатлар, фотосуратлар ва архив материаллари билан яқиндан танишиб, ўтмиш сабоқларидан чуқур хулоса чиқардилар. Тадбирнинг асосий мақсади ҳарбий хизматчилар қалбида тарихий хотирани асраш, ватанпарварлик руҳини мустаҳкамлаш ва маънавий юксалишни таъминлашдан иборат бўлди.
