Жорий йилнинг 2 апрель куни Тошкент шаҳрида Ўзбекистон Республикаси Миллий гвардияси ва Ўзбекистон Ёшлар иттифоқи ҳамкорлигида "Ёшлар пресс-клуби" ўтказилди.
Тадбирда Миллий гвардия қўмондони ўринбосари полковник С.Мамаюсупов ва Ҳарбий кадрлар тайёрлаш бўлими масъул офицерлари, Ёшлар иттифоқи Марказий кенгаши раиси ўринбосари - "Камалак" болалар ташкилоти раиси И.Холдарова ҳамда юзга яқин умумтаълим мактаби ўқувчи-ёшлари иштирок этди. Пресс-клуб вакиллари сўнгги йилларда юртбошимиз томонидан ёшларга оид давлат сиёсатига алоҳида эътибор қаратилиб, бу борада бир қатор фармон ва қарорлар қабул қилиниб, унинг ижроси юзасидан комплекс чора-тадбирларнинг амалга оширилаётганлигини эътироф этиб ўтишди.
Шунингдек, ўтган давр мобайнида Миллий гвардия томонидан ёшларни бир эзгу мақсад йўлида бирлаштириш ғояси остида амалга оширилаётган ишлар, кўплаб имкониятларни ўз ичига қамраб олган янги дастурлар тўғрисида кенг ва батафсил маълумотлар бериб ўтилди.
Шундан сўнг, пресс клубнинг асосий қисмида – ёшлар билан самимий ва очиқ мулоқот ўтказилиб, унда иштирокчилар ўзларини қизиқтирган барча саволларига тўлиқ жавоб олди. Шу билан бирга, ҳарбий соҳага қизиққан, ҳарбий либос кийишни орзу қилган ўқувчилар Миллий гвардия Ҳарбий-техник институти ва "Темурбеклар мактаби" ҳарбий академик лицейига ўқишга кириш тартиби ва шарт-шароитлари тўғрисида барча маълумотларга эга бўлишди. Миллий гвардия тизимида аёл ҳарбий хизматчи ва ходималарнинг хизмат олиб бориш тартиби ва уларга яратилган шарт-шароитлар тўғрисида ҳам тушунчалар берилди.
Тадбир сўнгида, ёшлар нафақат ҳарбий соҳага доир, балки бошқа бир қатор турли соҳага оид саволлар билан мурожаат этишгани билан бирга, улар томонидан билдирилган таклифлар ҳам инобатга олиниб, келгусида бу хусусда ҳам ишлар режалаштирилиши тўғрисида мутасадди раҳбарларга кўрсатмалар берилди.
Юрт келажаги зукко, ватанпарвар, ўз олдига юксак мақсадларни кўзлаган ёшлар қўлидадир. Ўтказилаётган бундай тадбирлар ёшларни Ватанга садоқат, муқаддас диёрга муҳаббат туйғулари ила камол топтириш, халқ тақдирига масъул этиб тарбиялаш, довюрак ва мард ўғил-қизлар сафи кенгайишига хизмат қилади десак адашмаймиз.