1 – РЕСПУБЛИКА ЁШЛАР ФОРУМИ ЮҚОРИ САВИЯДА БЎЛИБ ЎТДИ
Жорий йилнинг 11 май куни пойтахтимизда Ўзбекистон Республикаси Миллий гвардияси, Ички ишлар вазирлиги, Туризм ва спорт вазирлиги, Ёшлар ишлари агентлиги ҳамда Тошкент шаҳар ҳокимлиги ҳамкорлигида “Ватан келажаги ёшлар қўлида” шиори остида 1- Республика ёшлар форуми бўлиб ўтди.
Юнусобод туманида жойлашган “Ботаника” боғи ҳудудида мингдан ортиқ ёшларни қамраб олган мазкур Форум ёшларнинг бандлигини таъминлаш, уларнинг истеъдод ва иқтидорларини рўёбга чиқариш, спортга бўлган қизиқишини орттириш, касб-ҳунарга ўргатиш каби мақсадларни ўзида мужассам этди.
Тадбирга ташриф буюрган меҳмонлар даставвал Миллий гвардия ва Ички ишлар вазирлигининг ҳарбий ва хизмат техника воситалари намойиши билан танишиш, шунингдек, Миллий гвардия кинология хизмати ходимларининг хизмат итлари билан кўргазмали машғулотлари ёшларда катта таассурот қолдирди.
Шу билан бир қаторда, 5 ташаббус доирасида ўтказилган – китобхонлик, ёш рассомлар кўргазмаси, мусиқа ва рақс, спорт йўналишларида ёшларнинг чиқишлари тадбир иштирокчиларининг олқишига сазовор бўлган бўлса, ҳарбий оркестр ижросидаги мусиқа садолари ўқувчи ёшларда ватанпарварлик туйғуларини уйғотди.
Форумда сўз олганлар ёшларнинг қобилияти, спортга бўлган меҳри ва қизиқишларини кўриб, уларга юксак ишонч билдирган ҳолда бугунги кунда давлатимиз томонидан барча имкониятлар яратилаётганлигини таъкидлаб ўтишди.
Шундан сўнг, бандликни таъминлашда ўз ҳиссасини қўшиб келаётган илғор тадбиркорларга эсдалик совғалар ва ташаккурномалар топширилди.
Форум давомида ёшлар қалбида мардлик, жасурлик, бурч, садоқат каби туйғуларни шакллантирувчи видео роликлар намойиш этилди ва шу билан бирга курсантлар томонидан тайёрланган юртимиз осойишталигини кўз қорачиғидек асрашдек шарафли касб эгаларининг машаққатли хизматлари саҳна кўринишлари орқали ижро этилди.
Тадбир сўнгида, Миллий гвардия ва ИИВ ашула ва рақс ансамбли хонандаларининг куй - қўшиқлари ёшларга хуш кайфият бағишлади. Якунда ташкилотчилар томонидан ҳамкорликдаги бундай форумлар келгусида республикамизнинг бошқа ҳудудларида ҳам ўтказилиши режалаштирилиб олинди.
