АҲОЛИ БАНДЛИГИНИ ТАЪМИНЛАШ ЙЎЛИДА
Жорий йилнинг 16 февраль куни Тошкент вилояти ҳудудида хизмат фаолиятини олиб бораётган ҳарбий хизматчиларни ижтимоий қўллаб-қувватлаш масалалари юзасидан сайёр қабул ташкиллаштирилди. Унда Миллий гвардия қўмондонлиги ва вилоят бошқармаси мутасадди раҳбарлари, Чирчиқ ҳарбий прокуратураси, маҳалла ва оилани қўллаб-қуватлаш, адлия, бандлик ва меҳнат муносабатлари, халқ таълими ҳамда мактабгача таълим бошқармалари масъул вакиллари иштирок этдилар.
Мазкур тадбирда 100 дан ортиқ ҳарбий хизматчиларнинг оила аъзолари иштирок этиб, турмуш тарзи билан боғлиқ қатор масалалар жойида ечим топди. Ташриф буюрганларнинг айримлари ўз муаммоси билан эмас, аксинча маҳалладошлари ва ёшлар бандлигини таъминлашга қаратилган ташаббускорона таклифларини ўртага ташладилар.
Хусусан, ўз мурожаатида кичик тадбиркорликни йўлга қўйиш учун банкдан 250млн. кредит олиб, ўз тикув цехини очиб, ушбу маҳаллада яшовчи аёллар ва ёшларни иш билан таъминлашни мақсад қилганлигини билдирган ҳарбий хизматчининг турмуш ўртоғи Нигора Ашуровага имкон қадар тез муддатда иш бошлашига шароит яратиб берилиши мутасаддилар томонидан назоратга олинди.
Шунингдек, шу куннинг ўзида икки нафар аёллар текстил корхонасига доимий ишга жойлаштирилди. Бундан ташқари, алоқа ва мактабгача таълим соҳаларида мутахассисликка эга аёлларнинг мурожаатлари бўйича бўш иш ўринлари таклиф этилди. Шу билан бирга, болаларни боғчага жойлаштириш, хизматни доимий турар жойига кўчириш ва турар жой олиш бўйича йўлланган мурожаатлар ўрганиб чиқилиб, ижобий ҳал этилди. Бир сўз билан айтганда сайёр қабуллар шу жойнинг ўзида муаммоларни атрофлича ҳал этишга имкон яратди.
Тадбир сўнгида иштирокчиларга Миллий гвардия Маънавият ва маърифат маркази Ашула ва рақс ансамбли хонандалари иштирокидаги концерт дастури ҳавола этилди.
