"Алишер Навоий ва Бобур мероси – беқиёс маънавий хазина" мавзусидаги адабий-маърифий кеча
Миллий гвардия маънавият ва маърифат марказида ғазал мулкининг султони Мир Алишер Навоий, шоҳ ва шоир Заҳириддин Муҳаммад Бобур боболаримиз таваллудининг 582 ва 540 йиллиги айёмлари муносабати билан "Алишер Навоий ва Бобур мероси – беқиёс маънавий хазина" мавзусидаги адабий-маърифий кеча ўтказилди.
Тадбир аввалида ёшлар иштирокида расмлар кўргазмасига саёҳат уюштирилди ва улар ўртасида ғазал, рубоий айтиш бўйича баҳру-байт ўтказилди. Ўқувчи ва курсантлар ўзлари ёд олган шерларини бирин-кетин катта иштиёқ билан ижро этишди. Шундан сўнг, тадбирнинг асосий қисмига ўтилди. Юқорида келтириб ўтганимиз расмлар танлови ғолиблари диплом ва қимматбаҳо совғалар билан тақдирланди. Ўзбекистон давлат драма театри актёрлари томонидан саҳналаштирилган Алишер Навоийи ҳазратларининг "Хамса" асаридаги "Сабъаи сайёр" достонидан парча ҳам кечага ташриф буюрганларда катта таассурот қолдирди.
Шунингдек, тадбир давомида ҳарбий-мусиқа академик лицейи, Темурбеклар мактаби ўқувчилари томонидан ғазал ва рубоийлар айтилди ҳамда икки буюк шоир ва мутафаккирларнинг асарларидан саҳна кўринишлари намойиш этилди.
Жамоат хавфсизлиги университети курсантлари ижросидаги Примқул Қодировнинг "Юлдузли тунлар" асаридан Бобур ҳаёти ҳақидаги театр томошаси ҳам барчага бирдек манзур бўлди. Албатта, бундай тадбирлардан билиш мумкинки, ҳарбий хизматчи ҳамда ходимлар нафақат тинчлик ва осудаликни таъминлаш борасида фаолият юритишмоқда, балки маънавият улашишда ҳам фаоллик кўрсатишмоқда. Кеча сўнгида Миллий гвардия Ашула ва рақс ансамбли хонандаларининг Навоий ҳамда Бобур боболаримизнинг асарларига басталанган куй ва қўшиқлар ҳавола этилди.
