“ҚАЛҚОН” ЖАМОАТЧИЛИК ГУРУҲИ ЎЗ ФАОЛИЯТИНИ БОШЛАДИ
Ўзбекистон Республикаси Олий таълим, фан ва инновациялар вазирлиги, Мудофаа, Ички ишлар вазирликлари, Ўзбекистон Республикаси Миллий гвардияси, Ёшлар сиёсати ва спорт вазирликларининг қўшма қарорига асосан талабаларни ҳарбий ватанпарварлик руҳида тарбиялаш, жамоат тартибини сақлашга кўмаклашиш, ҳуқуқбузарликлар профилактикаси ва жиноятчиликка қарши курашиш, олий таълим муассасаларида ижтимоий-маънавий муҳитни барқарорлаштиришга кўмаклашиш мақсадида ҳар бир олий таълим муассасасида “Қалқон” жамоатчилик гуруҳи ташкил этилмоқда.
Миллий гвардия Шайхонтоҳур тумани қўриқлаш бўлимида туманда жойлашган олий таълим муассасалари Ўзбекистон давлат консерваторияси, Ўзбекистон давлат консерваторияси ҳузуридаги “Ботир Зокиров” номидаги ўзбек миллий эстрада санъати институти, Тошкент кимё-технология институти, Ўзбекистон халқаро ислом академияси талабаларидан ташкил топган “Қалқон” жамоатчилик гуруҳи аъзоларига гувоҳномалар топшириш маросими бўлиб ўтди. Тадбирни Миллий гвардия қўмондони ўринбосари полковник С.Мамаюсупов кириш сўзи билан очиб бериб, жамоатчилик гуруҳи аъзоларига бошлаётган ишларида сергаклини йўқотмасликни ва вазифаларига масъулият билан ёндашиш шартлигини таъкидлади. Шунингдек тадбирда масъул вазирлик ва Олий таълим муассасалари мутасадди раҳбарлари иштирок этишди.
Талабалар “Қалқон” жамоатчилик гуруҳи аъзолик гувоҳномаларини тантанали равишда қабул қилиб олишиб, ўз вазифаларини садоқат билан адо этишларига ваъда беришди. Мазкур тадбир намуна сифатида ўтказилди ва эндиликда республикамизнинг бошқа вилоятларида ҳам шу андоза асносида тадбирлар ташкил этилиши режалаштирилиб олинди.
Тадбир сўнгида барча талабалар жўр бўлишиб, ҳарбий оркестр мусиқа садолари остида баралла Ўзбекистон Республикаси мадҳиясини ижро этишди. Албатта ёшлар сиёсати соҳасидаги ишлар натижадорлигини ошириш ҳамда улар билан ишлаш тизимини янада такомиллаштириш бўйича амалга оширилаётган чора-тадбирларнинг ижросини таъминлашда ташкил этилаётган “Қалқон” жамоатчилик гуруҳи фаолияти ҳам аҳамиятли бўлади.
