Буюк саркарда соҳибқирон Амир Темур таваллудининг 685 йиллиги муносабати билан Миллий гвардия Навоий вилояти бўйича бошқармаси маъмурий биносида “Биз – Темурийлар авлодимиз!” мавзусида ҳарбий хизматчилар ва Навоий шаҳридаги умумтаълим мактаблари ўқувчилари иштирокида маданий тадбир ташкил этилди.
Амир Темур — ўзлигимизни англаш, миллий анъана ва қадриятларимизни тиклаш борасидаги улуғвор ишларда халқимизга маънавий куч бағишлаб келаётган улуғ сиймолардан биридир. Соҳибқирон таваллуд топган кун ва саркарда таваллудининг 685 йиллиги тадбирлари юртимиз бўйлаб кенг нишонланмоқда. Хусусан, Миллий гвардия Навоий вилояти бўйича бошқармаси ташаббуси билан ташкил этилган тадбир Соҳибқирон ва темурийлар салтанати тарихига оид машғулотлар билан бошланди. Унинг айнан ҳарбий қисм ҳудудида ўтказилишида ҳам рамзий маъно мужассам. Ота-боболаримиздан мерос шу муқаддас замин ишончли қўлларда эканилигига ишора бўлса, яна бир жиҳати ёшларда ватанпарварлик туйғуларини юксалтиришдан иборатдир.
100 нафардан ортиқ ёшлар иштирок этган тадбирда сўз олганлар Амир Темур ва темурийларнинг миллий давлатчилик тарихи, илм-фан, маданият, бунёдкорлик ва бошқа соҳалардаги улкан мероси, темурийларнинг дунё тараққиётига қўшган беқиёс ҳиссаси, саркарданинг мардлик, жасорат, адолат, садоқат ҳамда ватанпарварликка йўғирилган эътирофли ва эзгу фазилатлари мамлакатимизда олиб борилаётган сиёсат билан уйғун эканлигини такидлашди. Шундан сўнг, ҳарбий хизматчиларнинг саҳна кўринишлари намойиш этилиб, “Темур тузуклари” ва бошқа тарихий манбалардан айтилган фикрлар иштирокчиларда катта таассурот қолдирди. Ўқувчилар томонидан куйланган куй-қўшиқлар ҳамда Амир Темур ҳаётига оид манбаларнинг ўзбек, рус, инглиз ва қозоқ тилларида ифодаланиши барчага бирдек манзур бўлди.
Тадбир якунида фаол иштирок этган ёшларга Фахрий ёрлиқ ҳамда эсдалик совғалари топширилди. Таъкидлаш жоизки, бу каби тадбирларнинг кенг нишонланиши ёш авлоднинг тарихимизга оид билимини, улуғ бобомиз сиймосига ҳурмат-эҳтиромини янада юксалтиради.