АМИР ТЕМУР ТАВАЛЛУДИНИНГ 685 ЙИЛЛИГИГА БАҒИШЛАНГАН ТАДБИР
Айни кунларда, юртимиз бўйлаб Соҳибқирон Амир Темур таваллудининг 685 йиллигига бағишланган тадбирлар бўлиб ўтмоқда. Таъкидлаш жоизки, умумбашарият тарихида мислсиз аҳамиятга эга бўлган буюк соҳибқирон Амир Темур сиймосида халқимизнинг куч-қудрати, адолатпарварлиги, бунёдкорлиги мужассамдир.
Шу маънода, жорий йилнинг 8 апрель куни Милллий гвардия Бухоро вилояти бўйича бошқармаси ҳамда Қўриқлаш бошқармаси ҳамкорлигида Бухоро шаҳридаги 39-сонли ИДУМда Амир Темур таваллудига бағишланган катта тадбир бўлиб ўтди.
Тадбирнинг биринчи қисмида, Миллий гвардия Бухоро вилояти бўйича бошқармаси ҳарбий хизматчилари томонидан тайёрланган қўл жанги кўргазмали чиқишлари, шунингдек қурол-яроғларнинг кўргазмалари намойиш этилиб, 500 дан зиёд томошабин болажонларнинг қувончи ва ҳайратига сабабчи бўлди. Шу билан бирга, тадбир давомида эртамиз эгаларининг спортга бўлган қизиқишларини инобатга олган ҳолда, тош кўтариш ва арқон тортиш спорт тури бўйича мусобақалар ҳам ташкил этилиб, жисмонан чиниққан ва спортсевар ёшлар сараланди.
Тадбирнинг иккинчи ярмида эса, мактаб ўқувчилари томонидан тайёрланган кўргазмали чиқишлар ва Миллий гвардия ҳарбий хизматчи ва ходимларнинг Амир Темур тарихини ёдга олувчи қизиқарли маърузалари тингланди. Эътироф этиш лозимки, ёшларнинг Амир Темур тарихини мадҳ этувчи саҳна кўриниши, шеърлар, куй ва қўшиқлар, бир-биридан гўзал рақслар томошабинлар эътирофига сазовор бўлди.
Тадбир якунида, ушбу кечанинг ташкил этилишида фаол қатнашган ўқувчилар ҳамда спорт мусобақаси ғолибларига диплом ва эсдалик совғалари тақдим этилди.
