Аттракционларда хавфсизлик қоидаларига эътибор бермаслик аянчли оқибатларга олиб келиши мумкин
Жорий йилнинг 12 июнь куни тунги соат тахминан 22:10 лар атрофида Шайхонтоҳур туманида жойлашган «Анҳор – Локомотив» кўнгилочар боғида 24 ёшли Б.Э ва 30 ёшли Т.М лар ушбу боғда жойлашган «Мельница» номли аттракционда учиш чоғида хавфсизлик камарларини тақмаганликлари сабабли йиқилиб тушганлар.
Мазкур боғда хизмат олиб бораётган Миллий гвардия ҳарбий хизматчилари зудлик билан воқеа жойига етиб келиб, тез ёрдам келгунга қадар уларга биринчи тиббий ёрдам кўрсатишган.
Тез ёрдам етиб келгач, фуқаролар Чилонзор туманида жойлашган Республика тез тиббий ёрдам илмий марказига олиб кетилган.
Ҳурматли фуқаролар, кўнгилочар боғлар ҳудудида хавфсизлик қоидаларига риоя этишни ёдингиздан чиқарманг. Айниқса, аттракционларда учаётган пайтингиз йўриқномаларга амал қилган ҳолда, хавфсизлик камарлари тақилганлигини текшириб кўришни унутманг.
