Аввал хабар берганимиздек, Миллий гвардия қўмондони генерал-майор Р.Джураев раҳбарлигидаги идоралараро ишчи гуруҳ томонидан Қашқадарё вилоятида Давлатимиз Раҳбари топшириғининг амалий ижросини таъминлашга қаратилган ишлар амалга оширилмоқда.
Тадбир мобайнида Ишчи гуруҳ томонидан вилоят аҳолисининг энергетика ва озиқ-овқат таъминоти, соғлиқни сақлаш, ижтимоий-маиший муаммоларини аниқлаш ва бартараф этиш, ҳуқуқни муҳофаза қилиш ҳамда криминоген вазиятни янада барқарорлаштириш каби долзарб масалаларга асосий эътибор қаратилмоқда.
Миллий гвардия қўмондони бугун вилоят ИИБ биносида бўлиб, ташкил этилган ва ҳамкор вазирликлар ходимларидан иборат тезкор штаб фаолияти билан танишди. Ходимларга юклатилган масъулиятли вазифалар бўйича тушунчалар берилиб, ишчи гуруҳлар томонидан ўрганиш давомида аниқланган муаммоларни таҳлил қилиш ва уларнинг ечими бўйича йўл харитаси ишлаб чиқилиши юзасидан топшириқлар берилди.
Шундан сўнг, Қўмондон вилоят ҳокими билан биргаликда жойларга чиқиб, истеъмол бозорларидаги нарх-наво барқарорлигини таъминлаш, озиқ-овқат захираларини яратиш ҳамда тадбиркорлар учун яратилган шароитларлар ҳолати, шу билан бирга, IT йўналишида ёшлар учун яратилган шарт-шароитлар билан танишдилар.
Шунингдек, туман ва маҳаллаларда аҳолининг мурожаатлари билан ишлаш аҳволи юзасидан “бешлик” билан учрашиб фикр мулоҳазалари тингланди.
Ишчи гуруҳ томонидан мавжуд муаммоли масалаларни тезкор бартараф этиш чоралари юзасидан Миллий гвардия қўмондони Р.Джураев ҳамда вилоят ҳокими М.Азимов раислигида видео-селектор тарзидаги йиғилиш бўлиб ўтди.
Унда Ишчи гуруҳ таркибида бўлган Ўзбекистон Республикаси Президенти Администрацияси, Ички ишлар ва Адлия вазирликлари, Бош прокуратура, унинг ҳузуридаги Департамент, Солиқ қўмитасидан раҳбар ва масъул ходимлар, шунингдек, вилоят сектор раҳбарлари, Миллий гвардиянинг соҳавий хизматлари ҳамда бошқа мутасадди идоралар масъуллари иштирок этишди.
Йиғилишда вилоят аҳолисининг муаммоларини ўрганиш ва уларни бартараф этишдаги белгилаб олинган муҳим йўналишлар юзасидан ишчи гуруҳ раҳбарларига тегишлилиги бўйича топшириқлар берилди ва ҳамкорлик масалалари муҳокама қилинди.
Вилоятдаги барча мутасадди раҳбарлар ишчи гуруҳга ўз хизмат вазифаларини бажаришда яқиндан ёрдам кўрсатиши, аҳолини қийнаб келаётган муаммоларни бартараф этишга қаратилган асосли таклифларини тезкор штабга тақдим этишлари таъкидланди.
Идоралараро ишчи гуруҳ фаолияти Қашқадарё вилоятида давом этмоқда.
