Аввал хабар берганимиздек, криминоген вазиятни яхшилаш ва аҳоли осойишталигини таъминлашга қаратилган чора-тадбирлар Миллий гвардия қўмондони раҳбарлигидаги ишчи гуруҳ томонидан давом эттирилиб, пойтахтимиз бўйлаб тунги вақтда ҳамкорликда йўлга қўйилган хизмат фаолияти ўрганилмоқда.
Миллий гвардия қўмондони бошчилигида тузилган ишчи гуруҳ томонидан Тошкент шаҳрининг турли ҳудудларида тунги вақтларда хавфсизликни таъминлаш ва жамоат тартибини сақлаш бўйича ўрганиш ишлари олиб борилмоқда.
Тадбир доирасида Шайхонтоҳур ва Олмазор туманларида жойлашган бир қатор савдо ва дам олиш масканлари, маҳаллалар, шунингдек, фуқаролар гавжум тўпланадиган ҳудудларда кечаси амалга оширилаётган ҳамкорликдаги хизматлар ҳолати ўрганилди.
Хусусан, Tashkent City Маll ва Самарқанд Дарвоза савдо мажмуаларида ташкил этилган тунги қўриқлаш тизими, Камолон маҳалласидаги Бунёдкор кўчасида жойлашган 24/7 ишлайдиган кўнгилочар объектлар фаолияти, ушбу масканларда маҳаллий аҳоли ва сайёҳлар учун яратилган хавфсизлик шароитлари, шунингдек, яқин атрофдаги маҳаллаларда кечки хизматлар фаолияти кўздан кечирилди.
Тадбир давомида бозорлар, савдо марказлари ва аҳоли гавжум жойларда ҳуқуқбузарликларнинг олдини олиш, объектларнинг ишончли қўриқланиши, шунингдек, ҳодисалар юз берган тақдирда тезкор ҳаракатланувчи гуруҳларнинг ўз вақтида етиб келиши бўйича амалда мавжуд тизимлар ўрганилди ва баҳоланди.
Шунга ўхшаш тадбирлар Олмазор туманида ҳам давом эттирилиб, Ecobozor, Муз саройи, Чиғатой Арт 24/7, Ислом цивилизацияси маркази ҳамда Зиё маҳалласида тунги навбатчилик ва хавфсизликни таъминлашда жалб қилинган ҳуқуқни муҳофаза қилувчи органлар ўртасидаги ҳамкорлик фаолияти кўриб чиқилди. Тегишли раҳбарларнинг ахборотлари тингланиб, мавжуд муаммолар атрофлича муҳокама қилинди.
Ўрганишлар натижасида аниқланган камчиликлар юзасидан тегишли соҳа вакиллари билан маслаҳатлашувлар ўтказилиб, уларни бартараф этиш бўйича зарур чоралар белгиланди. Келгусида ҳамкорликни мустаҳкамлаш, иш самарадорлигини ошириш ҳамда фуқаролар хавфсизлигини таъминлаш борасида аниқ ва мақсадли вазифалар белгиланди.
