Миллий гвардия Жамоат хавфсизлиги университети юқори босқич курсантларининг, йиллик ўқув дастурлари асосида "Тактик тайёргарлик" фанидан эгаллаган  назарий билимларини амалиётда қўллаш баробарида ҳарбий хизматчиларнинг  жанговар, психологик ва жисмоний кўникмаларини мустахкамлаш  мақсадида дала ўқув полигонларида ўн суткалик амалий машғулотлар амалга оширилди.

Унда курсантлар дала шаройитида чодирлар ўрнатиш орқали ҳарбий шаҳарча барпо этишлари ва  бўлинмаларнинг умумҳарбий низом талаблари асосида жойлашуви, шунингдек суткалик хизмат ташкил этилиши билан боғлиқ хавфсизликни таъминлаш масалаларига алоҳида эътибор қаратилди.

 Чирчиқ дала полигонида ўтказилган мазкур амалий машғулотда Жамоат хавфсизлиги университети  курсантлари  томонидан пиёда тартибда 30 км масофага марш амалга оширилди. Машғулотда турли мураккаб шароитларда ҳаракатланиш, душманнинг тўсатдан уюштириши мумкин бўлган ҳужумларидан ҳимояланиш, шунингдек, курсантларнинг чидамлилик ва жисмоний қобилиятлари синовдан ўтказилди.

Мазкур ўқув машғулотлар давомида курсантларнинг ўз қуролига бўлган ишончини ошириш ва ундан моҳирлик билан фойдаланиш, замонавий жанг шароитларда душманни кам ўқдори сарфлаган ҳолда тезкорлик билан йўқ қилиш, шунингдек бўлинма таркибида  жамоавий ҳаракатланишнинг  ўзига хос хусусиятлари амалий жиҳатдан мустаҳкамлаб олинди.

Ушбу амалий машғулотларда бўлажак офицерларнинг фавқулодда вазиятларда, тоғли ва нотекис масштабларда ҳаракатланиш, шунингдек ностандарт вазиятларда тезкор ва тўғри қарор қабул қилиш борасидаги билим кўникмалари ҳам оширилди.