Бухорода “Ёш гвардиячи” ҳарбий-спорт мусобақасининг вилоят босқичи ўз ниҳоясига етди.
Ўқувчи ёшларни ватанга муҳаббат, ҳарбий бурчга садоқат руҳида тарбиялаш, улар орасида соғлом турмуш тарзини тарғиб қилиш, мардлик, жасурлик, шижоат, жасорат, қатъият, куч-ғайрат, интизом, жамоатчиликка таяниш каби туйғуларни шакллантириш, юрт тинчлиги ва ҳимояси йўлида бор салоҳияти билан масъулиятни ўз зиммасига олишга қодир, ташаббускор, шижоатли ёшларни бирлаштириш, уларнинг интеллектуал ва ижодий салоҳиятини рўёбга чиқариш мақсадида Миллий гвардия Бухоро вилояти бўйича бошқармаси, Ёшлар иттифоқи вилоят Кенгаши, Ёшлар ишлари агентлиги ҳамда Мактабгача ва мактаб таълими бошқармаси ҳамкорлигида мусобақа ташкил этилди. Мазкур мусобақада шаҳар ва туманларда ғолибликни қўлга киритган умумтаълим мактабларининг 9-11 синф ўқувчиларидан иборат 12 та жамоа иштирок этди.
Тадбир иштирокчилари жамоани таништириш, билимдонлар беллашуви, саф тайёргарлиги, заҳарланган ҳудуддан ўтиш, ўқ-дориларни белгиланган жойга етказиш ва ўқдонга жойлаш, автоматни нотўлиқ қисмларга ажратиш ва йиғиш, биринчи тиббий ёрдам кўрсатиш, сувли тўсиқдан ўтиш, қизиқарли эстафета каби 8 та шарт бўйича ўзаро беллашдилар.
Беллашув якунига кўра, Шофиркон тумани жамоаси биринчи ўринни эгаллаб Республика босқичида иштирок этиш имкониятини қўлга киритди.
