БУЮК СИЙМОНИ ЁДГА ОЛИБ
Амир Темур — ўзлигимизни англаш, миллий анъана ва қадриятларимизни тиклаш борасидаги улуғвор ишларда халқимизга маънавий куч бағишлаб келаётган улуғ сиймолардан биридир.
Соҳибқирон таваллуд топган кун мамлакатимизда ҳар йили кўтаринки руҳда кенг нишонланади. Бу йил ҳам улуғ саркарда таваллудининг 685 йиллиги тадбирлари катта хурсандчилик билан ўтказилмоқда. Бугун Миллий гвардия Андижон вилояти бўйича бошқармасида Амир Темур бюстининг тантанали очилиш маросими бўлиб ўтди.
Унда Миллий гвардия Андижон вилояти бўйича бошқармаси ҳамда Қўриқлаш хизмати ҳарбий хизматчи ва ходимлари, Олий таълим, Халқ таълими ва Мактабгача таълим идоралари вакиллари, ёзувчи-шоирлар, олимлар, талаба-ёшлар, кенг жамоатчилик вакиллари иштирок этди.
Тадбирга мактаб ўқувчилари томонидан тайёрланган саҳна кўринишлари, мусиқий чиқишлари ўзгача кўрк бағишлади. Спорт мусобақалари эса Темурбек авлодларини бефарқ қолдирмади.
Бу каби тадбирларнинг азалий қадриятларимизга ҳамоҳанг тарзда нишонланиши ёш авлоднинг ва ҳарбий хизматчиларимизнинг тарихимизга оид билимини, улуғ бобомиз сиймосига ҳурмат-эҳтиромини янада юксалтиради.
