Бухоро вилоятида ноқонуний балиқ овлаш ҳолатига чек қўйилди
Жорий йилнинг 31 октябрь куни Миллий гвардия Бухоро вилояти бўйича бошқармаси, ҳудудий ички ишлар бўлими ҳамда экология ва атроф-муҳитни муҳофаза қилиш бўлимлари билан ҳамкорликда ўтказилган навбатдаги рейд давомида Пешку туманидаги “Қорақир” табиий сув ҳавзасида ноқонуний балиқ овлаш ҳолати фош этилди.
Текширув жараёнида фуқаролар С.Т. ва А.Ж. резина қайиқ ҳамда 35 дона леска тўридан фойдаланиб, жами 650 дона вовла балиқларини тутаётган вақтида тўхтатилди. Атроф ҳудудни кўздан кечириш чоғида эса 3 қопда 333 дона вовла ва 94 дона салютка балиқлари ҳам топилиб, уларнинг ҳеч қандай рухсатномасиз овланганлиги аниқланди.
Рейд натижасида жами 1079 дона балиқ, 1 дона резина қайиқ ва 35 дона леска тўри вақтинча олиб қўйилди ҳамда қонун доирасида Маъмурий жавобгарлик тўғрисидаги кодекснинг 90-моддаси (Ов қилиш ва балиқ овлаш қоидаларини, шунингдек ҳайвонот дунёсидан фойдаланишнинг бошқа турларини амалга ошириш қоидаларини бузиш) билан тегишли ҳужжатлар расмийлаштирилди.
Мазкур тадбир атроф-муҳитни муҳофаза қилиш, биологик ресурслардан оқилона фойдаланиш ҳамда ноқонуний балиқ овлашга қарши курашиш мақсадида амалга оширилди.
