Чақирувга қадар бошланғич тайёргарлик фани ўқитувчилари учун ташкил этилган маҳорат дарслари давом этмоқда
Ўзбекистон Республикаси Миллий Гвардияси ҳамда Мактабгача ва мактаб таълими вазирлиги ҳамкорлигида Республикамиз вилоятларида Миллий гвардияга бириктирилган 56 та мактабнинг ҳарбий-ватанпарварлик синфларининг чақирувга қадар бошланғич тайёргарлик фани ўқитувчилари учун пойтахтимиздаги “Темурбеклар мактаби” ҳарбий академик лицейида ташкил этилган ўқув йиғинининг иккинчи куни ҳам бир қатор ўқув машғулотлари ва кўргазмали тадбирларга бой бўлди.
Чақирувга қадар бошланғич тайёргарлик фани ўқитувчилари учун Миллий гвардия ҳарбий оркестри ва фахрий қоровул батальони томонидан мусиқали ва саф чиқишлари намойиш этилди.
Шунингдек, жанговар бўлинмалар ҳам ўзларининг турли ноодатий вазиятларда душманни йўқ қилишга қаратилган ҳаракатларини кўргазмали тарзда кўрсатиб беришди.
Бундан ташқари улар топография фанидан машғулотларда иштирок этишиб, ўз билим ва кўникмаларини ошириб боришмоқда.
Албатта ушбу ташкил этилган ўқув йиғини чақирувга қадар бошланғич тайёргарлик фани ўқитувчилари учун малакасини ошириш, ўзаро тажриба алмашиш имконини яратмоқда. Бу эса ўз навбатида ҳарбий ватанпарварлик синфларида ўқиётган ёшларни келгусида муддатли ҳарбий хизматга тайёрлашга ва ҳарбийлик сир асрорларини ўргатишда натижасини беради.
