Давлатимиз раҳбари томонидан, ўқувчиларни бўш вақтларини мазмунли ўтказиш ва касбга йўналтириш, шунингдек тарбияси ва ўқишида муаммоси бўлган ўқувчиларни ота-оналари ва маҳалла фаоллари билан биргаликда ечимини топиш борасида белгилаб берилган вазифалар юзасидан, Миллий гвардия қўмондони Р.Джураев бошчилигида манзилли ишлар олиб борилмоқда
Мазкур йўналишдаги ишлар Миллий гвардия қўмондони Р.Джураев томонидан Тошкент шаҳри Учтепа туманидаги 228-сонли мактаби ва Тошкент вилояти Зангиота туманида жойлашган 13-мактабнинг ўқитувчи мураббийлари, инспектор-психологлари, ҳудудий маҳалла раислари ҳамда соҳага оид мутасадди раҳбарлар иштирокидаги учрашувда муҳокама қилинди.
Учрашув давомида ўтган ҳафта якуни бўйича мактаб ўқувчиларининг айниқса юқори синф ўқувчилари давомати билан боғлиқ муаммолар таҳлил қилиниб, электрон платформага киритилган давомат маълумотлари билан синфлардаги реал давомат ўртасида тафовутга йўл қўйилмаслиги ҳамда бу каби ҳолатларнинг салбий оқибатлари ҳақида сўз юритилди.
Шунингдек, сурункали равишда дарсга келмайдиган, тарбияси ва ўқишида муаммоси бўлган ўқувчилар, Миллий гвардиядан бириктирилган ҳодимлар ҳамда инспектор-психологлар томонидан ўрганилиб “Мактаб – ота-она – маҳалла” занжири асосида, ота-оналар ва маҳалла фаолларини масъулиятини ошириш бўйича кескин чоралар кўриш юзасидан вазифалар белгилаб берилди. Ўқувчиларни бўш вақтларини мазмунли ўтказиш ва касбга йўналтириш борасида эса мактаб базасида фан ва спорт тўгараклари фаолиятини йўлга қўйиш бўйича соҳага оид мутасадди раҳбарларга топшириқлар берилди.
Ҳар иккала мактаб директорлари С.Самигова ва Д.Рахматуллаевалар Давлатимиз раҳбари томонидан ўқувчи ёшларнинг таълим-тарбияси ва давоматига қаратилган эътиборлари ва Миллий гвардиянинг мактабларга бириктирилиши қисқа вақт ичида ўзининг ижобий таъсирини кўрсата бошлаганини мамнуният билан таъкидлашди. Шунингдек, мактаб директори ва ўқитувчилари эндиликда давомат билан эмас, фақат таълим-тарбия билан шуғулланишлари тўғрисидаги талаблар, уларнинг елкаларидаги оғир юкни олиб ташлаш билан бирга, ўз ўрнида катта масъулият юклашини хис қилаётганликларини билдиришди.
