Давлатимиз раҳбари томонидан белгилаб берилган устувор вазифалар ижроси юзасидан Миллий гвардия Жамоат хавфсизлиги университетида учувчисиз учиш аппаратлари (УУА) мутахассисларини тайёрлаш бўйича навбатдаги ўқув йиғини бўлиб ўтди
Ўзбекистон Республикаси Президенти, Қуролли Кучлар Олий Бош Қўмондони Шавкат Мирзиёев раислигида Хавфсизлик кенгашининг давлат ҳарбий хавфсизлиги ва мудофаасини мустаҳкамлаш масалаларига бағишланган йиғилишда қўйилган топшириқлар ижроси юзасидан бугунги кунда Қуролли Кучлар жанговар хизмат фаолиятида учувчисиз учиш аппаратларидан (УУА) самарали фойдаланиш бўйича кенг миқёсли ишлар олиб борилмоқда.
Мамлакатимиз раҳбарияти томонидан, ҳуқуқни муҳофаза қилувчи органларнинг жамоат хавфсизлигини таъминлаш ва жиноятчиликка қарши кураш бўйича вазифаларни бажариш жараёнларига УУАдан кенг фойдаланишни жорий этишга йўналтирилган чора-тадбирлар аниқ белгилаб берилган.
Бугунги кунда белгиланган вазифаларнинг муваффақиятли ижросини таъминлаш мақсадида, Университетнинг Қайта тайёрлаш ва малака ошириш факультетида ташкил этилган тегишли ўқув курслари, УУА мутахассисларини тайёрлаш бўйича ўз фаолиятини самарали амалга оширмоқда.
Тингловчилар йиғин давомида жанговар хизмат вазифаларини бажариш жараёнида учувчисиз учиш аппаратларини эксплуатация қилиш бўйича назарий ва амалий кўникмаларга эга бўлишди.
Ўқувларнинг сўнгги босқичида, тингловчилар билан якуний имтиҳонлар ташкиллаштирилиб, битирувчиларга тегишли сертификатлар топширилди.
