Ўзбекистон Республикаси Спорт вазири А. Икрамов, Ўзбекистон камондан отиш федерацияси раиси-Миллий гвардия қўмондони Р.Джураев иштирокида, Бутунжаҳон камондан отиш федерацияси бош котиби Tom Dielen ва Корея камондан отиш Ассоциацияси вице-президенти Youngsool JANG лар билан учрашуви бўлиб ўтди.
Ушрашув олдидан Ўзбекистон Республикаси Спорт вазири А.Икрамов меҳмонларнинг Ўзбекистонга ташрифини қутлаб самимий тилакларини билдирди. Шундан сўнг, ушбу учрашувнинг долзарблиги таъкидланиб, камондан ва паракамондан отиш спорти ҳақиқий тарихий ўзгаришларга қадам қўяётганлигига алоҳида урғу берилди.
Спорт вазири томонидан мамлактимизда Ўзбекистон Республикаси Президенти, Миллий Олимпия қўмитаси раиси Шавкат Мирзиёев бошчилигида барча спорт турлари янги босқичга олиб чиқилаётганлиги, мазкур йўналишда белгилаб берилган муҳим масалалар юзасидан, камондан (паракамондан) отиш соҳасида ҳам Федерация раиси томонидан Олимпиада ва Паралимпиада ўйинларига тайёргарликни самарали ташкил этиш борасида халқаро хамкорлик масалаларига алоҳида эътибор қаратилаётганлиги муҳим аҳамият касб этиши таъкидланди.
Ўзбекистонда камондан ва паракамондан отиш спортининг ривожланиши, Миллий Олимпия қўмитаси томонидан ҳам қўллаб-қувватланиб кенг имкониятлар яратиб берилаётгани, спортчиларни Олимпия медалларига интилишлари эса ишончли стратегияга айланиб улгургани ва бу спорт соҳасидаги ишларни янги босқичга  қадам қўйганлигининг мантиқий натижаси эканлиги таъкидланди.
Шундан сўнг, учрашув очиқ мулоқот тарзида давом этиб, Бутунжаҳон камондан ва паракамондан отиш федерациялари ва Ўзбекистон федерацияси ўртасидаги ҳамкорликни кенгайтириш, Корея, Россия каби ривожланган мамлакатларнинг мутахассислари билан малака ошириш дастурларини ташкил этиш, Бутунжаҳон камондан отиш федерацияси томонидан тасдиқланган илғор методикаларни қўллаш, жисмоний ва психологик тайёргарликнинг замонавий усулларидан фойдаланиш, спорт инвентари ва майдонларнинг сифатини Олимпиада талабларига мос равишда такомиллаштириб бориш каби муҳим масалалар муҳокама қилинди.
Дўстона ва самимий руҳда ўтган учрашув давомида меҳмонларнинг ҳар бири ҳамкорликнинг ҳозирги ҳолати ва истиқболлари тўғрисида фикр юритиб, юқорида муҳокама қилинган ҳамкорлик масалалари ва таклифлар қўллаб-қувватланиши айтиб ўтилди.  
Меҳмонлар тадбир якунида Ўзбекистонда спорт соҳасида амалга оширилаётган ишларни юқори баҳолаб, яратиб берилаётган имкониятлар албатта ўз самарасини беришига ва 2028 йилда Лос-Анжелесда бўлиб ўтадиган Олимпия ўйинларида барча турдаги спортчилар томонидан юқори натижалар қўлга киритилиб, Ўзбекистонни жахон рейтингидаги кўрсаткичлари ўнталикдан кам бўлмаган ўринларда бўлишига катта ишонч билдирдилар.