Республикамиз бўйлаб Миллий гвардия ҳарбий хизматчилар ва ходимлари иштирокида ўқув-семинарлари ўтказилиб, унда сайлов комиссиялари вакиллари жорий йилнинг 27 октябрь куни бўлиб ўтадиган Ўзбекистон Республикаси Олий Мажлиси Қонунчилик палатаси ва маҳаллий Кенгашлар депутатлари сайловининг мазмун-моҳияти ва аҳамиятини тушунтирмоқда.
Тадбирлар давомида иштирокчиларга 2023 йил 18 декабрдаги ЎРҚ-883-сон Қонуни ҳақида батафсил маълумот берилмоқда. Мазкур қонунга кўра, айрим қонун ҳужжатларига сайлов ва референдум ўтказиш тартибини янада такомиллаштиришга қаратилган муҳим ўзгартириш ва қўшимчалар киритилган.

Киритилган ўзгартиришларга кўра Олий Мажлис Қонунчилик палатаси депутатлари сайловини аралаш сайлов тизими (кўпчилик ва пропорционал) асосида ўтказиш, шунингдек, сайлов органларининг марказлашган тизимини шакллантириш, сайлов комиссиялари тизимини оптималлаштириш, сайлов комиссиялари фаолиятини такомиллаштириш назарда тутилган. Марказий сайлов комиссиясининг фаолияти ва сиёсий партиялар томонидан кўрсатилган аёллар сонини хам оширилди.

Хусусан, сайлов кодексига киритилган ўзгартиш ва қўшимчаларга мувофиқ Қонунчилик палатаси депутатларини сайлаш учун 75 та ҳудудий бир кишилик сайлов округлари тузилади;партия рўйхатига киритилган номзодлар ушбу сиёсий партиянинг аъзоси ёки партиясиз бўлиши мумкин. Бошқа сиёсий партияларнинг аъзолари ушбу рўйхатга киритилиши мумкин эмас, аёллар сони сиёсий партия томонидан бир мандатли сайлов округларида, шунингдек партия рўйхати асосида кўрсатилган депутатликка номзодлар сонининг камида 40% ни ташкил қилиши керак (илгари 30% гача). Шу билан бирга, партия рўйхатидаги кетма-кетликдаги бешта номзоднинг камида иккитаси аёллар бўлиши керак.