"Ёнғин хавфсизлиги ойлиги" доирасида Тошкент "Темурбеклар мактаби"да Миллий гвардия ва Фавқулодда вазиятлар ходимлари ҳамкорлигида профилактик тадбир ташкиллаштирилди.
Айни кунларда республикамиз бўйлаб "Ёнғин хавфсизлиги ойлиги" давом этмоқда. Пойтахтимиздаги маҳалла фуқаролар йиғинлари, ташкилотлар ва муассасаларда кенг тарғибот тадбирлари ўтказилмоқда.
Хусусан, Тошкент "Темурбеклар мактаби"да Миллий гвардия ва Миробод тумани Фавқулодда вазиятлар бошқармаси ҳамкорлигида ёнғин хавфсизлиги ойлиги доирасида тадбир ташкиллаштирилди.
Тадбирдан кўзланган асосий мақсад иситиш ускуналари ва газ мосламаларидан фойдаланиш қоидалари, газ ва ҳаво аралашмасининг чақнаши, фуқароларни ис газидан заҳарланиши ва бошқа нохуш ҳолатларни олдини олишга қаратилган.
Миробод тумани Фавқулодда вазиятлар бошқармаси масъуллари томонидан ёшларга қишнинг совуқ кунларида ёнғин хавфсизлиги қоидаларига риоя қилишлари ва нималарга эътибор қаратишлари лозимлиги ҳақида тушунчалар бериб ўтилди.
Тадбир давомида Миллий гвардия ҳамда Тошкент шаҳар Ички ишлар Бош бошқармаси мутахассис-кинологлари ўзларига бириктирилган хизмат итлари билан биргаликда кўргазмали чиқишлар намойиш этишди.
