Фарғона вилоятида икки нафар маҳаллий аҳоли гиёҳванд моддаларни сотаётган вақтда қўлга олинди
Жорий йилнинг 15 февраль куни Қўқон шаҳар ички ишлар органлари фаолиятини мувофиқлаштириш бошқармаси ҳамда Миллий гвардия Фарғона вилояти бўйича бошқармаси ходимлари томонидан ўтказилган ҳамкорликдаги тезкор-профилактик тадбир давомида Данғара туманида яшовчи Б.И. тўртта пакетга қадоқланган умумий оғирлиги 2 грамм бўлган “гашиш” гиёҳвандлик моддасини 400 минг сўмга сотмоқчи бўлган вақтида ушланди. Текширув давомида қўлга олинган шахсдан яна 20 грамм гиёҳвандлик моддаси топилиб, олиб қўйилди.
Шунингдек, 20 февраль куни ҳам Миллий гвардия Фарғона вилояти бўйича бошқармаси ва Қўқон шаҳар ички ишлар органлари ходимлари томонидан ўтказилган тезкор-профилактик тадбирлар натижасида фуқаро M.Д. 4 грамм “гашиш”ни 500 минг сўмга сотмоқчи бўлган вақтда ашёвий далиллар билан қўлга олинди.
Текширув вақтида қўлга олинган шахсдан электрон тарозилар, пневматик қурол ва яна 9 грамм “гашиш” гиёҳвандлик моддаси топилди ва олиб қўйилди.
Ҳозирда ҳар иккала ҳолат юзасидан Қўқон шаҳар ИИБ томонидан тергов ҳаракатлари олиб борилмоқда.
