Фарғона шаҳрида ҳарбий хизматчи ва ходимлар ҳамда уларнинг оила аъзолари иштирокида оммавий сайёр қабул ўтказилди
Фарғона шаҳрида жойлашган Шарқий ҳарбий округи Маънавият ва маърифат марказида Қуролли кучлар тизимида хизмат қилаётган ҳарбий хизматчи ва уларнинг оила аъзолари иштирокида оммавий сайёр қабул бўлиб ўтди.
Унда Бош прокуратура, Мудофаа вазирлиги, Миллий гвардия қўмондонлиги, Республика ҳарбий прокуратураси, Фавқулодда вазиятлар вазирлиги ҳарбий хизматчи ва ходимлари, шунингдек, уларнинг оила аъзолари иштирок этишди.
Очиқ мулоқот аввалида Қуролли кучлари тизимида олиб борилаётган ислоҳотлар, ҳарбий хизматчи ва ходимлар учун яратилаётган шарт-шароитлар ҳамда имкониятлар хусусида сўз юритилди.
Сайёр қабул давомида 100 га яқин фуқаролардан турли йўналишлар бўйича мурожаатлар келиб тушди.
Хусусан, хизмат вақтида вафот этган марҳум ходим Матазимов Рустамнинг турмуш ўртоғи Шаҳноза Матазимова иш билан бандлигини таъминлашда амалий ёрдам сўраб мурожаат қилди ва бу муаммо жойида ижобий ҳал этилди.
Ишга жойлашиш, фарзандларни мактаб ва мактабгача таълим ташкилотларига жойлаш, хизмат жойини кўчириш масалалари, оилавий тадбиркорликни йўлга қўйиш учун кредитлар олиш каби йўналишларда келиб тушган бир қатор муаммолар ҳам ўз ечимини топди.
Меҳрибонлик уйи битирувчиси Шерматов Мўминжон ҳозирда Миллий гвардия "Қўриқлаш" бошқармасида офицерлик лавозимида хизмат қилиб келмоқда. У ҳам яратилаётган шароитлар ва имкониятлардан мамнун ҳолда, ўз миннатдорчилигини изҳор қилиш мақсадида сайёр қабулга ташриф буюрди.
Таъкидлаш жоизки, бу каби сайёр қабуллар ҳарбий хизматчи ва ходимлар,шунингдек, уларнинг оила аъзоларини ҳуқуқ ва эркинликларини, қонуний манфаатларини амалга оширишда дуч келган муаммоларни ижобий ҳал этишга кенг замин яратмоқда.
