ФАРОВОН ОИЛА – ЖАМИЯТ РАВНАҚИНИНГ АСОСИ
Жорий йилнинг 19 май куни Миллий гвардиянинг Тошкент вилоятида жойлашган ҳарбий қисми ташаббуси билан Чирчиқ давлат педагогика институти ва Республика Маънавият-маърифат маркази ҳамкорлигида ҳарбий хизматчилар ва уларнинг оила аъзолари иштирокида “Фаровон оила – жамият равнақининг асоси” мавзусида тадбир ўтказилди.
Тадбирга Республика Маънавият-маърифат маркази аъзоси, халқаро тоифадаги спикер, “Меҳнат шуҳрати” ордени соҳибаси, фалсафа фанлари доктори, профессор Ж.Т. Шермухаммедова, Чирчиқ шаҳар маънавият-маърифат бўлими раҳбари М.И. Тўраева, Чирчиқ давлат педагогика институти психология фанлар номзоди доцент Ш.Р. Самарова ва психология кафедраси катта ўқитувчиси Ш.С. Абдусаматова ташриф буюрди.
Замон талаблари асосида интерактив усулда ташкиллаштирилган мазкур тадбирда етук маънавиятчи ва психологлар томонидан гендер тенглиги, оилада фарзанд тарбияси, соғлом муҳит ҳақида керакли тушунчалар берилди. Айтиш жоизки, мамлакатимизнинг ҳар томонлама равнақ топишида жамиятдаги оилаларнинг фаровонлиги муҳим аҳамият касб этади.
Шунингдек, семинар услубида ташкил этилган тадбирда иштирок этган ҳарбий хизматчиларнинг 50 дан ортиқ оила аъзолари томонидан берилган саволларга мутахассислар ҳаётий мисоллар асосида жавоб беришди. Тренингда шарқона гендер тенглиги масаласига ҳам тўхталиб, унинг афзаллик жиҳатлари айтиб ўтилди.
Якунда ҳарбий қисм бадиий ҳаваскорлик жамоаси томонидан куй-қўшиқлар ижро этилди.
Шу билан бирга, тадбирга ташриф буюрган ҳарбий хизматчилар фарзандлари ўртасида 5 та муҳим ташаббус доирасида шахмат-шашка, расм чизиш, китоб ўқиш бўйича мусобақалар ташкиллаштирилиб, ғолибларга совғалар тақдим қилинди.
