ҒАЛАБА МУБОРАК!
Бугун пойтахтимизда жойлашган “Humo” аренада бўлиб ўтган бокс кечасида Ўзбекистонлик боксчилар тенгсиз эканликларини яна бир бор намойиш этдилар. Жанг кечаси доирасида 8 нафар боксчимиз рингга кўтарилиб, мутлоқ ғалабани қўлга киритдилар.
Хусусан, Миллий гвардия ҳарбий хизматчилари Иқболжон Холдоров , Ҳасанбой Дўсматов, Баҳодир Жалолов, Муроджон Аҳмадалиев жангларида яққол устунлик билан барча томошабинларда улкан таассурот қолдирдилар.
Таъкидлаш жоизки, хизматдошимиз Иқболжон Холдоров профессионал боксдаги дебют жангида Танзаниялик рақиби Кулва Буширига қарши рингга кўтарилиб, нокаут эвазига ғалаба қозонди.
"Рио" олимпиадаси ғолиби катта лейтенант Ҳасанбой Дўсматов эса Танзаниядан ташриф буюрган боксчи Муҳсин Кизотани иккинчи раунддаёқ мағлуб этиб, WBA International камарини қўлга киритди.
Бокс оқшомининг ёрқин юлдузи хизматдошимиз Баҳодир Жалолов Латвия вакили Кристапс Зуицга қарши рингга кўтарилди ва катта устунлик билан кечган жангнинг 2 раундида Жалолов рақибини нокаутга учратди.
Бокс кечасининг асосий жангида иштирок этган Миллий гвардия ҳарбий хизматчиси Муроджон Аҳмадалиев Япониялик Рёсуке Ивасага қарши рингга кўтарилди. Хизматдошимиз кетма кет кучли зарбалар эвазига жангни ўз вақтидан олдин якунлаб, WBA ва IBF камарларини муносиб ҳимоя қилишга муяссар бўлди.
Барча спортчиларимизни бугунги ғалаба билан муборакбод этиб, доимо қўллари баланд келишига тилакдошмиз.
