Халқимиз учун эзгулик, меҳр-мурувват, саховат, олижаноблик ва шукроналик тимсоли бўлган ва юксак инсонпарварлик тамойилларини ўзида мужассам этган муборак Рамазон ойида Миллий гвардия масъул раҳбарлари томонидан хизмат вақтида ҳалок бўлган навоийлик ҳарбий хизматчи Ҳазрат Суюновнинг оила аъзолари ҳолидан хабар олинди.
Ватан равнақи, тинчлиги йўлида, қолаверса, чегараларимиз дахлсизлиги ва жамоат тартибини сақлашда мард жасур ўғлонларимиз ўз ҳаловатларидан кечиб хизмат қилмоқда. Улар ҳаттоки ўрни келганда ўз жонларини фидо қиладилар. Мана шундай юрт посбонлари орасида навоийлик марҳум Ҳазрат Суюнов хам бор.
Навоий вилояти Нурота заминида туғилган Ҳазрат Суюнов агар ҳаёт бўлганида бугун 31 ёшни қаршилаган бўлар эди. У Ўзбекистон Республикаси Миллий гвардияси сафларида садоқат билан хизмат қилиб, 28 ёшида Сирдарё вилояти Сардоба қишлоғида содир бўлган техноген талафотни бартараф этиш вақтида фидойиларча ҳалок бўлди. Унинг кўрсатган мардлиги ва жасурлиги юракларда мангу қолди.
"Жасорат" медали соҳиби Суюнов Ҳазрат Кароматович хотирасини шод айлаш мақсадида, муқаддас Рамазон ойида Миллий гвардия Марказий девони масъул раҳбарлари иштирокида унинг туғилиб ўсган хонадонида Ифторлик ташкиллаштирилди.
Маълумот учун: Ҳазрат Суюновнинг хотирасига бағишлаб унинг бюсти 2021 йилнинг 28 августида Нурота туманида жойлашган 10-сонли умумтаълим мактаб ҳовлисига ўрнатилган. Унинг турмуш ўртоғи Ш. Бекназарова ҳозирда Навоий вилоятида "Қўриқлаш"бошқармасида фаолият юритиб келмоқда.
