Давлатимиз раҳбарининг “Ўзбекистон Республикаси давлат мустақиллигининг ўттиз бир йиллиги  муносабати билан ҳарбий хизматчилар ва ҳуқуқни муҳофаза қилиш органлари ходимларидан бир гуруҳини мукофотлаш тўғрисида"ги Фармони билан Миллий гвардия ҳарбий хизматчи ва ходимларидан  бир гуруҳи ҳам мукофотланди.

Шу муносабат билан, жорий йилнинг 31 август куни бўлиб ўтган тантанали маросимда, Миллий гвардия қўмондони генерал-майор Р.Джураев тизимдаги барча шахсий таркибни мустақиллигимизнинг 31 йиллиги билан самимий муборакбод этиб, 15 нафар давлат мукофотларини ўз эгаларига топширди.  

Шунингдек, ZOOM платформаси орқали мазкур тадбирда жойлардан иштирок этган соҳа вакилларига қўмондон буйруғи ўқиб эшиттирилиб, хизматда юқори натижаларга эришган 8 нафар ҳарбий хизматчи ва ходимларга навбатдаги “полковник” ҳарбий унвонлари ҳамда 4 нафарига   муддатидан олдин навбатдаги “подполковник” махсус унвонлари, 38  нафарига “Аъло хизматлари учун”, 16 нафарига “Миллий гвардия фидоий ходими”, 7 нафарига “Маънавият аълочиси”, 114 нафарига “Намунали хизматлари учун”,  кўкрак нишонлари ҳамда фахрий ёрлиқлар топширилди.

Муддатли ҳарбий хизматчиларнинг ота-оналарига эса миннатдорчилик хатлари жўнатилди. Мазкур байрам муносабати билан тизимда фаолият юритиб келаётган 770 нафар ҳарбий хизматчи ва ходимлар муносиб тақдирландилар.

Юртбошимизнинг  тантанали маросимдаги нутқида  “Мард ва жасур ҳарбийлар мамлакатимиз сарҳадларини ҳимоя қилиш, эл-юртимизнинг тинчлиги ва осойишталигини сақлаш йўлида фидокорона хизмат қилмоқда. Мен сизларни ўзимнинг энг яқин маслакдошларим, сафдошларим деб биламан. Барчамиз аҳил ва ҳамжиҳат бўлиб, садоқат билан меҳнат қилиб, янги Ўзбекистонни яратаётганимиз билан фахрланамиз. Халқимизга, сизлар каби мард ва шижоатли юртдошларимизга ишониб маррани катта олдик. Биз учун биттаю битта тўғри йўл, ягона мақсад бор: у ҳам бўлса, кўпмиллатли халқимиз, жонажон Ўзбекистонимиз манфаати йўлида хизмат қилишдир” дея ишонч билдирганликлари,  Миллий гвардия тизимидаги барча шахсий таркибининг келгуси фаолиятида “БУРЧ, САДОҚАТ, ЖАСОРАТ” шиори остида шижоат билан хизмат қилишларига янада куч-ғайрат бахш этади.