Ҳарбий шаҳарчада бунёд этилган уйлар байрам арафасида ўз эгаларига топширилди
Табиатнинг уйғониш рамзи бўлган Наврўз байрами юртимизда кенг нишонланмоқда. Ушбу улуғ айём кунларига ҳамоҳанг тарзда ўтказилган мазкур тантанали маросим ҳам ҳарбий хизматчи ва ходимлар ҳамда уларнинг оила аъзолари учун унутилмас кун бўлди десак муболаға бўлмайди.
Тошкент шаҳрининг Яшнобод туманида бунёд этилган ҳарбий шаҳарчадаги кўркам ва замонавий кўринишга эга бўлган кўп қаватли уйлардаги 300 та хонадоннинг калитлари байрам арафасида ўз эгаларига топширилди.
Ушбу тантанали тадбирда Миллий гвардия қўмондони генерал-майор Р.Джураев, Тошкент шаҳар Яшнобод тумани ҳокими Б.Рахманқулов ҳамда мутасадди раҳбарлар шунингдек, ҳарбий хизматчи ва ходимларнинг оила аъзолари иштирок этдилар.
Тадбирда самимий байрам тилаклари билан ўз нутқини бошлаган Миллий гвардия қўмондони ҳарбий хизматчи ҳамда ходимлар ва уларнинг оила аъзоларининг ижтимоий ҳимояси доимо давлатимизнинг асосий диққат марказида эканлигини алоҳида таъкидлаб, яратилаётган улкан имкониятларнинг барчаси юртимиз тинчлиги ва осойишталигини сақлашда жонбозлик кўрсатиб келаётган тизим ҳарбий хизматчиларининг фидокорона хизматларига бўлган муносиб эътироф эканлигини қайд этиб ўтди.
Шу билан бирга, байрамона руҳда ўтган тадбирда Миллий гвардия қўмондонининг буйруғига кўра хизмат фаолияти давомида юқори натижаларга эришган, фидоий ва жонкуярлиги билан сафдошларига намуна бўлиб келаётган бир гуруҳ ҳарбий хизматчи ва ходимларга навбатдаги “полковник” ҳарбий унвони,фахрий ёрлиқ, кўкрак нишонлари ва қимматбаҳо совғалар тантанали равишда топширилди.
Янги уйлар ва ҳарбий унвонлар муборак бўлсин!
