Хоразм вилоятида Миллий гвардия тизимида хизмат қилаётган ҳарбий хизматчи ва ходимлар иштирокида "Жалолиддин Мангуберди ворислари" танловининг Республика босқичи бўлиб ўтди.
Мазкур танлов билимдонлар беллашуви, камондан отиш, от устида найза улоқтириш, қўл гранатасини узоқликка ва аниқликка улоқтириш, турникда тортилиш, қуролни нотўлиқ қисмларга ажратиш ва йиғиш ҳамда 3 км масофага югуриш шартлари бўйича ўтказилди.
Муросасиз ва қизғин баҳсларга бой бўлган беллашув якунида ғолиблар муносиб рағбатлантирилди. Якуний натижаларга кўра фахрли 3-ўринни Миллий гвардия Сирдарё вилояти бўйича бошқармаси жамоаси, фахрли 2-ўринни Ўзбекистон Республикаси Миллий гвардияси 98162 ҳарбий қисм жамоаси,
мусобақанинг мутлоқ ғолиби фахрли 1-ўринни Миллий гвардия Хоразм вилояти бўйича бошқармаси жамоаси қўлга киритди.
Тадбир якунида Урганч шаҳрида жойлашган Мусиқали драма театрида Хоразм вилояти Маданият бошқармаси хонандалари томонидан куй ва қўшиқлар ижро этилди. Шунингдек, Жалолиддин Мангуберди ҳаётига бағишланган саҳна кўринишлари намойиш этилди.
